"نىعماتۋلين تاپسىرىس بەرگەن": جازىقسىز ايىپتالعان كاسىپكەر 10 جىلدان كەيىن اقتالدى

3431
Adyrna.kz Telegram

بەلگىلى بالقاشتىق كاسىپكەر قۋات سۇلتانبەكوۆتى 10 جىل تۇرمەدە وتىرعاننان كەيىن جوعارعى سوت اقتادى، دەپ حابارلايدى "ادىرنا" ءتىلشىسى.

"شەشىم (اقتاۋ ۇكىمى - جۋرناليست ەسكەرتپەسى) بۇگىن شىعىس قازاقستاندا وعان قارسى قولدان جاسالعان سوڭعى ءۇش قىلمىستىق ءىستىڭ بارلىعى بويىنشا شىعارىلدى", - دەپ سارسەنبى كۇنى ادۆوكات يۋليا دجافاروۆا راستادى.

وسىلايشا، 2012 جىلدىڭ العاشقى ۇكىمى بويىنشا سۇلتانبەكوۆ جازاسىن وتەپ بىتكەنىن ەسكەرە وتىرىپ، ول جاقىن ارادا بوساتىلۋى ءتيىس.

«وبلىستىق (شىعىس قازاقستان وبلىسىنىڭ – جۋرناليست ەسكەرتپەسى) سوتى شەشىم شىعارىپ، ونى سۇلتانبەكوۆ قاماۋدا جاتقان استانا قالاسىنىڭ تەرگەۋ يزولياتورىنا جىبەرگەن بويدا ول دەرەۋ بوساتىلادى»، - دەدى دجافاروۆا.

ەسكە سالايىق، سۇلتانبەكوۆ 2012 جىلى مامىردا اتىس قارۋىن زاڭسىز ساتىپ الدى، ساقتادى، تاسىمالدادى نەمەسە الىپ ءجۇردى دەگەن ايىپپەن ايىپتالىپ، ءۇش جىل التى ايعا باس بوستاندىعىنان ايىرىلعان بولاتىن. الايدا، وعان قاتىستى قورىتىندى شىعارىلعاننان كەيىن كوپ ۇزاماي باس بوستاندىعىنان ايىرۋ ورىندارىندا جاڭا ىستەردى ويدان شىعارۋ باستالدى، ناتيجەسىندە بىرنەشە ۇكىمنەن كەيىن باس بوستاندىعىنان ايىرۋ مەرزىمى 3,5 جىلدان 21 جىلعا دەيىن ءوستى. سۇلتانبەكوۆ پەن ونىڭ تۋىستارى كاسىپكەردى قىلمىستىق قۋدالاۋعا جانە وعان قاتىستى جازانى ودان ءارى قاتايتۋعا ءماجىلىستىڭ ەكس-سپيكەرى نۇرلان نىعماتۋلين مەن ونىڭ ەگىز ءىنىسى ەرلاننىڭ تاپسىرىس بەرۋشىلەرى ەكەنىن بىرنەشە رەت ايتقان.

"ادىرنا" ۇلتتىق پورتالى

پىكىرلەر