ءمادينا سادۋاقاسوۆانىڭ جارناماسىنا الداندىم: 500 مىڭ تەڭگەگە كۋرس وقىعاندار “جالعان” سەرتيفيكاتتار العان

3219
Adyrna.kz Telegram

«قازاقستانداعى №1 نۋتريتسيولوگ بولاسىزدار». ءبىر توپ قازاقستاندىقتار وسىنداي ۋادە بەرگەن «Health Academy» دەنساۋلىق اكادەمياسىنىڭ جۇمىسىنا نارازى. بۇل تۋرالى “ادىرنا” ۇلتتىق پورتالى Stan.kz سايتىنا سىلتەمە جاساپ حابارلايدى. 

 

قىزىلوردا قالاسىنىڭ تۇرعىنى، كوپ بالالى انا سيناي ءامىرحانوۆا  – “Health Academy” اكادەمياسىندا ونلاين ءبىلىم العان جانداردىڭ ءبىرى. نەگىزگى كەڭسەسى الماتى قالاسىندا ورنالاسقان وقۋ ورتالىعىنىڭ ءدارىسىن ول سەگىز ايعا جۋىق تىڭداعان. جاس كەلىنشەك اكادەمياعا 500 مىڭ تەڭگە تولەگەنىن ايتادى، الايدا وقۋدىڭ ساپاسىنا ەش كوڭىلى تولماعانىن جاسىرمايدى.

“مەن بۇل اكادەميا تۋرالى الەۋمەتتىك جەلىلەردەن ءبىلدىم. ونىڭ ۇستىنە وقۋ ورتالىعىنىڭ SMM مامانى ۇگىتتەدى. تانىمال ءانشى مادينا سادۋاقاسوۆا، بلوگەر بالقيا بالتاباي سەكىلدى تۇلعالاردىڭ جاساعان جارناماسىنا دا سەندىم. بىلىكتى نۋتريتسيولوگ بولىپ، جەكە كابينەتتەرىڭدى اشىپ جۇمىس جاساي الاسىڭدار دەدى. اكادەميا باسشىسى تالشىن ارتىققىزى كۋرس بارىسىندا اناليزدەردى تالداۋدى، بالالاردىڭ اس قورىتۋ فيزيولوگياسىن، دەتوكسيكاتسيا جاساۋ، ىشەك اۋرۋلارىن جانە ينديۆيدۋالدى ەمدەۋدى ۇيرەتەمىن دەدى. بارلىق سەرتيفيكاتتارىم بار. 500 مىڭ تەڭگەنى بانكتەن نەسيە ارقىلى الدىم، بىراق ماعان ەشقانداي فيسكالدى چەك بەرىلمەدى. الايدا اكادەميا وقۋ بىتىرگەننەن كەيىن بەرگەن ديپلومى مەن سەرتيفيكاتتارى ەش جارامسىز ەكەن. جەكە كاسىبىمدى اشۋعا كىرىستەر دەپارتامەنتىنە بارعانىمدا ماماندارى تىركەۋدەن باس تارتتى. وسىلايشا اكادەمياعا الدانىپ قالدىم”، - دەيدى قىزىلوردالىق كەلىنشەك.

گۇلدانا امانباي دا اتالمىش اكادەميانىڭ قىزمەتىنە جۇگىنگەن. بۇگىندە ول الماتى قالاسىنداعى كلينيكالاردىڭ بىرىندە انەستەزيست بولىپ ەڭبەك ەتەدى. دەكرەتتىك دەمالىسى كەزىندە جاڭا باعىتتا ءبىلىم الىپ، جەكە نۋتريتسيولوگ كابينەتىن اشۋدى جوسپارلاعان ەكەن. الايدا ول قوماقتى قاراجاتىم جەلگە ۇشتى دەپ اشىنادى.

“قازىر مەن بىلەتىن 30-دان استام ءبىلىم الۋشى ادىلدىك ىزدەپ شىرىلداپ ءجۇر. ءبىز اكادەميا اقشامىزدى قايتارىپ بەرۋىن تالاپ ەتەمىز. وقۋعا 500 مىڭ تولەدىم، سول قارجىعا تۇرارلىق ءبىلىم بەرىلگەن جوق. عالامتورداعى ورىسشا مالىمەتتەردى بىزگە اۋدارىپ بەرە سالعان. كەرى بايلانىس بولمادى. اكادەميانىڭ جارناماسىنا الدانىپ قالدىق. بىزگە كوپ ۋادە بەرىلگەن ەدى، وكىنىشكە قاراي، ەشقايسىسى ورىندالمادى. ديپلومىمىز بەن سەرتيفيكاتتارىمىز ەشنارسەگە جاراماي قالدى”، - دەپ اشىنادى گۇلدانا امانباي.

بۇگىندە “Health Academy” اكادەمياسىن تامامداعان ءبىر توپ قازاقستاندىقتار ادىلدىك ىزدەپ قۇقىق قورعاۋ ورگاندارىنا جۇگىنگەن. شاعىمدانۋشىلاردىڭ ايتۋىنشا، ولاردىڭ ارىزى نەگىزىندە ءتيىستى تەرگەۋ شارالارى جۇرگىزىلۋدە. الايدا وقۋ ورتالىعىنىڭ جۇمىسى توقتاعان جوق. قازىردىڭ وزىندە اكادەميا Instagram الەۋمەتتىك جەلىسى ارقىلى جارناماسىن جۇرگىزىپ، كوپشىلىكتى نۋتريتسيولوگيا بويىنشا ءبىلىم الۋعا شاقىرىپ جاتىر.

“مەن تۇركىستان وبلىسى قازىعۇرت اۋدانىنىڭ تۇرعىنىمىن. اكادەميانىڭ ديپلومى بار نۋتريتسيولوگ ماماندارىن دايارلايمىز دەگەن جارناماسىنا قىزىقتىم. اكادەميانىڭ جۇمىسىن تالشىن ارتىققىزى مەن كۇيەۋى ەلدار وسپانوۆ جۇرگىزدى. ساباق ونلاين فورماتتا وتكەندىكتەن كەلىسىمشارتقا قول قويىلمادى. ديپلومدى العاننان كەيىن ونىڭ ەشقانداي كۇشى جوق ەكەنىن ءبىلدىم. زاڭسىز جارامسىز قۇجاتتى الۋ ءۇشىن ءبىر جىلعا جۋىق ۋاقىتىم مەن قوماقتى قاراجاتىم كەتتى. ساباق بارىسىندا بەرىلگەن اقپارات ساپاسىز جەلىدەن الىنعان بولىپ شىقتى”، - دەيدى ايجان ۋسمانوۆا ەسىمدى تاعى ءبىر ءبىلىم الۋشى.

بولعان جاعدايدى انىقتاۋ ءۇشىن، سايت ءتىلشىسى “Health Academy” دەنساۋلىق اكادەمياسىنا حابارلاسقان بولاتىن. وقۋ ورتالىعىنىڭ باسشىلىعى بولىپ جاتقان كەلەڭسىز جاعداي تۋرالى حاباردار بولىپ شىقتى، ارنايى جالداعان زاڭگەرى رەسمي مالىمەت بەرگەن بولاتىن.

“اتالمىش اكادەميا 2021 جىلدان بەرى جۇمىس جاساپ كەلەدى. قوسالقى ءبىلىم بەرۋ قىزمەتتەرىن جۇزەگە اسىرۋدا. “Health Academy” دۇرىس تاماقتانۋعا قاتىستى اقپاراتتىق ءبىلىم بەرەتىن مەكەمە بولعاندىقتان، مۇندا وقىعان شاكىرتتەر العان بىلىمدەرىن تەكجەكە وزدەرىنىڭ دۇرىس تاماقتانۋىنا پايدالانا الادى. ال مەديتسينا، حيميا جانە بيولوگيا بىلىمدەرى بار شاكىرتتەر دۇرىس تاماقتانۋ بويىنشا كەڭەسشى بولىپ، «Health Academy» العان بىلىمدەرىن تاجىريبەدە قولدانا الادى”، - دەپ جاۋاپ بەردى اكادەميا ادۆوكاتى قادىرجان ءمولداشارىپ.

قازىر شاعىمدانۋشى تاراپ قۇزىرلى ورگاندارىنىڭ جۇمىس ناتيجەسىن كۇتۋدە.

“ادىرنا” ۇلتتىق پورتالى

پىكىرلەر