سوڭعى بەس جىلدىقتا قىزىلوردا قالاسىنىڭ باس جوسپارىنا سايكەس جاڭا مولتەك اۋداندار بوي كوتەرىپ، حالىق سانى قارقىندى ارتۋدا.
ماسەلەن، سىرداريا وزەنىنىڭ سول جاعالاۋىنان بوي كوتەرگەن جاڭا تۇرعىن اۋداندا الەۋمەتتىك نىساندار، كوپقاباتتى تۇرعىن ۇيلەر جانە «بايتەرەك» مولتەك اۋدانىنان «بالا مەكەن» ەلدى مەكەنى سالىنىپ كوپبالالى وتباسىلارعا باسپانا تابىستالدى. سايكەسىنشە، قالا اۋماعىنداعى جولاۋشىلار تاسىمالىنىڭ مارشرۋتتىق سىزباسى ءبىرشاما وزگەرىسكە ۇشىراپ، مولتەك اۋدانداردى قوعامدىق كولىكپەن تولىقتاي قامتاماسىز ەتۋ قاجەتتىلىگى تۋىندادى.
وسى باعىتتا قالا كولەمىندەگى جولاۋشىلار تاسىمالداۋعا ارنالعان كولىكتەردىڭ جەتكىلىكسىزدىگى تۋرالى تۇرعىندار تاراپىنان كوپتەگەن شاعىم تۇسە باستادى.
ماسەلەنىڭ ءمان-جايىن ەسكەرگەن ايماق باسشىلىعى قوعامدىق كولىك ماسەلەسىن شەشۋ جانە حالىق سۇرانىسىنا ساي قىزمەت ساپاسىن ارتتىرۋ ماقساتىندا، «قىزىلوردا اۆتوبۋس پاركىنە» قوسىمشا ۇلكەن سىيىمدىلىقتاعى، زاماناۋي اۆتوبۋستار الدىرۋ جونىندە شەشىم قابىلدادى.
ايماق باسشىسىنىڭ تاپسىرماسىنا سايكەس، «قىزىلوردا اۆتوبۋس پاركى» جشس-ءنىڭ جارعىلىق كاپيتالىن ۇلعايتۋ ماقساتىندا «ونەركاسىپتى دامىتۋ قورى» اق ارقىلى ليزينگكە 150 اۆتوبۋس الۋ جۇمىستارى جۇرگىزىلۋدە. قوعامدىق كولىكتەردى الدىرۋ ءۇشىن العاشقى 20 پايىز جارناسىن تولەۋ ءۇشىن وبلىستىق جانە قالالىق بيۋدجەتتەن ءتيىستى قاراجات قاراستىرىلدى.
ايتا كەتەيىك، جاڭادان الىنعان اۆتوبۋستار قالاىشىلىك قوعامدىق كولىكتەردىڭ 14 باعىتىن قامتيدى. بۇل ءوز كەزەگىندە قوعامدىق كولىك قىزمەتىنىڭ ساپاسىن ارتتىرۋعا ايتارلىقتاي سەپتىگىن تيگىزگەلى وتىر. جولاۋشىلار تاسىمالداۋعا ارنالعان سىيىمدىلىعى جوعارى اۆتوبۋستار بيىل تولىق الىنادى دەپ جوسپارلانىپ وتىر.
