شقو-دا ارزانعا قانت ساتامىن دەپ جۇرتتى الداعان الاياق 90 ملن تەڭگەنى قالتاعا باسقان، دەپ حابارلايدى "ادىرنا" پورتالى.
شقو پوليتسيا دەپارتامەنتى ءباسپاسوز قىزمەتىنىڭ مالىمەتىنە سۇيەنسەك، الاياق ءوزىن كوتەرمە ساۋداگەر رەتىندە تانىستىرىپ، نارىقتاعىدان الدەقايدا ارزان باعاعا قانت ساتاتىندىعىن جەتكىزگەن. ول ازاماتتاردان الدىن الا تولەم جاساۋدى سۇراپ، تاۋاردى تەك سودان كەيىن الا الاتىندىقتارىن ايتتى. بۇعان سەنگەن وسكەمەن مەن ريددەر قالالارىنىڭ 100-گە جۋىق تۇرعىنى ايەل ادامنىڭ شوتىنا 5 مىڭنان 4 ميلليون تەڭگەگە دەيىنگى مولشەردە اقشا جىبەرگەن. ال ارام ويىن ىسكە اسىرعان الاياق حابار-وشارسىز كەتتى.
«ءبىر اپتانىڭ ىشىندە وسىنشاما ادام الدانىپ وتىر. ولارعا كەلتىرىلگەن جالپى شىعىن كولەمى 90 ملن تەڭگەنى قۇرايدى. كۇدىكتى رەتىندە وسكەمەندە تۇراتىن 29 جاستاعى ايەل قولعا ءتۇستى. اتالعان فاكتى بويىنشا قر قك-ءنىڭ 190-بابى 3-بولىگىنە (الاياقتىق) سايكەس سوتقا دەيىنگى تەرگەۋ امالدارى جۇرگىزىلۋدە»، - دەيدى دەپارتامەنتتىڭ ءباسپاسوز قىزمەتىنىڭ باسشىسى تاتيانا كارپوۆا.
