داۋرەن قۋات: بولات ءابىلوۆ ساۋ سيىردىڭ بوعى ەمەس!

6279

«بولات ءابىلوۆ»، «بولات ءابىلوۆ»، «بۋتيا» دەپ جاتىر ەكەنسىزدەر عوي. مەن ايتايىن، سول بۋتيالارىڭىز دا «ساۋ سيىردىڭ بوعى ەمەس». ول دا كەشەگى جابايى جەكەشەلەندىرۋدىڭ تۇسىندا قازاقتىڭ بايلىعىن ساۋعانداردىڭ ءبىرى.

ول دا بانكتەن قايتارىمسىز نەسيە الىپ ەسىرگەندەردىڭ ەڭ الدىندا تۇر. وڭىرىنە قاتارلاپ تىزگەن تۇيمەسى كوپ كاشىمىر كاستوم-شالبار كيىپ، كوممەرتسيالىق ارنالاردان تۇسپەي بازار ەكونوميكاسىن بار داۋىسىمەن جارنامالاعانداردىڭ جاميعاتىنان تابىلىپ جۇرگەن بۇل جىگىت كوسموپوليتتىك بۋرجۋازيانىڭ كوشىن باستاپ بەرگەنىمەن، تۋعان حالقىنىڭ جاعدايىنا اسا كوپ الاڭداعان ەمەس.

بۋتيانىڭ قولىنان «ءدام تاتقاندار»، «كەرەمەتكە كەنەلگەندەر» ازىن-شوعىن بار شىعار، بىراق ول تۇتاس ەل قامقورى بولا العان جوق. ەسكى جۇيەنىڭ تۇسىندا ساياساتپەن ازدى-كەم اينالىسىپ، بىردە كورىنىپ، بىردە كورىنبەي قالىپ، جالپى جۇرتپەن جاسىرىنباق ويناۋعا ماشىقتانعان سول بۇتەكەڭ، ياعني بولات ءابىلوۆ اياق استىنان بەلسەندى بولىپ، وسى كۇندەرى بيلىكتى قارالاپ جازبالار جازىپ، «جاڭا قازاقستاندى» جەرلەپ، جانۇشىرا ارەكەتكە كوشىپ جاتقان كورىنەدى. مەنىڭشە، ونىڭ ارتىندا «جاڭا قازاقستانعا» جۇدىرىعىن ءتۇيىپ وتىرعان بىرەۋلەر بار. ءبىر كۇشتى الەۋەت يەسى – كۋكلوۆود بار. مىناۋ – سولاردىڭ تاپسىرىسىن ورىنداۋشى.

بۋتياشىلاردىڭ ءبىرىنىڭ ءسوزىن ءبىرى ءىلىپ الىپ، قازىرگى بيلىكتى جارىسا، دالەلسىز ايىپتاۋعا كوشۋى تاپسىرىس ورىنداۋشىلاردى ەلەستەدى. ولار "ايلامىزدى اسىرىپ، قۋلىقپەنەن قاتىردىق" دەپ ويلاماسىن. «سۋدىڭ دا سۇراۋى بار» ەكەنىن ۇمىتپاسىن! وتىرىكشىنىڭ قۇيرىعى ءبىر-اق تۇتام دەگەن. ءارى-بەرىدەن سوڭ، بولات ءابىلوۆتىڭ دە قازىنا مۇلكىن «جەكەشەلەندىرۋگە» قالاي قاتىسقانى جۇرتتىڭ كوز الدىندا عوي. ونىڭ قازىرگى كۇرت بەلسەندىلىگى «قورىققان بۇرىن جۇدىرىقتايدى» دەگەننىڭ كەرىن كەلتىرىپ تۇرعانداي.

ءابىلوۆ پەن ءابىلوۆتىڭ ىزىنە ەرگەندەردىڭ سوزىنە باقساق، قاڭتار وقيعاسى كەزىندە قاراپايىم حالىقتىڭ بەيبىت شەرۋىن ءوز ماقساتىنا پايدالانىپ، بۇلىك باستاپ، ەل ءىشىن الا تايداي بۇلدىرۋگە كىرىسكەن باسبۇزارلاردىڭ ارەكەتىنە رەسمي بيلىك قول قۋسىرىپ قاراپ تۇرا بەرۋ كەرەك ەكەن... سوندا رەسمي بيلىك عيماراتتاردى قيراتىپ، دۇنيە-مۇلىكتى توناپ، جازىقسىز جاندارعا وق جاۋدىرعان سودىرلارعا توسقاۋىل قويماۋى كەرەك پە ەدى؟! جوق! مەملەكەت باسشىسى باتىل ەرىك-جىگەر تانىتىپ، باسبۇزارلاردىڭ بەتىن قايتارىپ، مەملەكەتتىڭ ىرگەسىن شايقالتپاي ساقتاپ قالدى. ول – ناعىز ەلدىك ءىس. مەملەكەتتىڭ تاۋەلسىزدىگىن، ەل بولاشاعىن، حالىق قامىن ويلاعان تۇلعانىڭ ءىسى – بۇل!

قاسىم-جومارت توقاەۆ از ۋاقىت ىشىندە ەلدە ساياسي رەفورمالاردى قارقىندى جۇرگىزدى، جەمقورلىققا قارسى كۇرەس اشتى. مەملەكەت مۇلكى مەن قاراجاتىن كەزىندە زاڭسىز يەلەنىپ العانداردان ۇرلانعان، تونالعان دۇنيەنى قايتارىپ الا باستادى. ونىڭ العاشقى تولقىنى مەملەكەت قازىناسىنا قۇيىلعانىنا ءبارىمىز كۋامىز. بۇل ءىس ارى قاراي دا جالعاسا بەرمەك.

سوندىقتان قازىرگىدەي قاۋىپتى، الماعايىپ كەزدە قالىڭ جۇرتتىڭ قامىن ويلاعان قاسىم - جومارت كەمەلۇلىنداي ازاماتقا ءبىر كىسىدەي قولداۋ بىلدىرگەن دە عانا بەرەكە تاباتىنىمىزدى بىلگەنىمىز ابزال. ويتكەنى، قازاق – بەرەكە مەن بىرلىكتى قاستەرلەيتىن حالىق. اتادان بالاعا ميراس بولعان سول قۇندىلىعىلىمىزدى «ۇستاعاننىڭ – قولىنا، تىستەگەننىڭ – اۋزىنا» بەرىپ قويماۋىمىز كەرەك.

"ادىرنا" ۇلتتىق پورتالى

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket