قازاقستاندا جاڭا مەكتەپتەر قارقىندى تۇردە سالىنىپ جاتىر، ال مامان تاپشىلىعى ءالى دە بار. بۇل تۋرالى سۋلەيمان دەميرەل اتىنداعى ۋنيۆەرسيتەتتىڭ رەكتورى داۆرونجون گايپوۆ ايتتى.
ونىڭ ايتۋىنشا، ەلىمىزدە مۇعالىم تاپشىلىعىن جويۋ ماقساتىندا قولعا الىنعان قايتا دايارلاۋ كۋرستارى ماسەلەنى شەشۋگە سەپتىگىن تيگىزەدى. پەداگوگيكالىق ءبىلىمى جوق ماماندار كۋرستان ءوتىپ، مەكتەپتە ساباق بەرە الادى. رەكتور جوبا قالاي جۇزەگە اسىرىلىپ جاتقانىن ءتۇسىندىردى.
«قازاقستاندا جاڭا مەكتەپتەر قارقىندى تۇردە سالىنىپ جاتىر، ال مامان تاپشىلىعى ءالى دە بار. اسىرەسە، ينفورماتيكا، فيزيكا پاندەرىنىڭ مۇعالىمدەرى سۇرانىسقا يە. ۋنيۆەرسيتەتىمىزدەگى بىلىكتىلىكتى ارتتىرۋ جانە يننوۆاتسيا ورتالىعى وسى باعىتتا جۇمىس ىستەيدى. پەداگوگيكالىق قايتا دايارلاۋ كۋرستارىن وتكىزۋ – الەمدىك ۇدەرىس. بۇل – انگلياداعى PGCE باعدارلاماسىنىڭ قازاقستاندىق انالوگى بولىپ تابىلاتىن زياتكەرلىك ءونىم. ارالاس فورماتتا وتەتىن التى ايلىق وقىتۋ كۋرسىن ءساتتى اياقتاعان تىڭداۋشىلارعا مەكتەپتە مۇعالىم بولىپ جۇمىس ىستەۋگە قۇقىق بەرەتىن مەملەكەتتىك ۇلگىدەگى سەرتيفيكات بەرىلەدى. ءبىزدىڭ ورتالىقتىڭ باسقالاردان ەرەكشەلىگى – پراكتيكاعا باعىتتالعان پەداگوگيكالىق كومپونەنتتەردى بەرەمىز. سونداي-اق بۇل كۋرستارعا ماگيسترانتتار دا قاتىسا الادى»، – دەدى ول.
باكالاۆر ديپلومى قايتا دايارلاۋ باعدارلاماسىندا وتەيىن دەپ جاتقان پاندەرگە سايكەس بولۋى كەرەك. ماماندىعى سايكەس كەلمەيتىن تۇلەكتەر بۇل باعدارلاماعا قاتىسا المايدى. وسى ۋاقىتقا دەيىن پەداگوگيكالىق قايتا دايارلاۋ كۋرسىنا 17 مامان قاتىسىپ، ونىڭ تەك جەتەۋى سەرتيفيكاتتالعان مامان اتاندى.
سولاردىڭ ءبىرى – ماتەماتيك قىمبات ءجۇسىپوۆا.
«مەن قاراعاندى وبلىسى ساتپاەۆ قالاسىندا جەكەمەنشىك ءبىلىم بەرۋ ورتالىعىن اشتىم، سوندا ماتەماتيكادان ساباق بەرەمىن. بىلىكتىلىگىمدى ارتتىرۋ ماقساتىندا، ساباق بەرۋدىڭ جاڭا ادىستەمەلەرىن ۇيرەنۋ ءۇشىن 6 ايلىق كۋرسقا قاتىستىم. ماعان ساباقتار مەن ەمتيحانداردىڭ ونلاين فورماتتا وتكەنى ءتيىمدى بولدى. اسىرەسە، ماتەماتيكا، ءXXى عاسىرداعى كوشباسشىلىق، پسيحولوگيا ساباقتارى ماعان ەرەكشە ۇنادى. كوپ جىلدان بەرى مەكتەپتە جۇمىس ىستەپ جۇرگەن ۇستازدارعا زاماناۋي فورماتتا ساباق بەرۋدى ۇيرەنۋ ءۇشىن قايتا دايارلاۋدان وتۋگە كەڭەس بەرەمىن»، – دەدى ول.
قر وقۋ-اعارتۋ ءمينيسترى اسحات ايماعامبەتوۆ بۇل باستاما مەكتەپكە ساپالى مۇعالىمدەردى تارتۋ ماقساتىندا جۇزەگە اسىرىلىپ جاتقانىن العا تارتادى.
«مىسالى، ماتەماتيكا ماماندىعىن يگەرگەن، بىراق پەداگوگيكا بويىنشا ديپلوم الماعان ماماندار بار. ەندى زاڭناماعا ەنگىزىلگەن وزگەرىسكە سايكەس، ماتەماتيكتەر پەداگوگيكانى وقىتاتىن ارنايى كۋرستان كەيىن مەكتەپتە مۇعالىم بولا الادى. وسى ءراسىم بويىنشا مەكتەپكە ساپالى مۇعالىمدەردى تارتامىز. پەداگوگ بولۋى كەرەك دەگەن مىندەت جوق. باستى شارت – ماتەماتيكانى جاقسى ءبىلۋ»، – دەدى مينيستر.
سدۋ رەكتورىنىڭ ايتۋىنشا، قازىرگى تاڭدا كۋرسقا قاتىسۋعا نيەت بىلدىرۋشىلەر كوپ، الايدا، ۇمىتكەرلەر قاتاڭ ىرىكتەۋدەن ءوتىپ، تالاپقا ساي ماماندار عانا سەرتيفيكات الادى.
«كۋرسقا قاتىسۋشى ءوز باعىتىن دۇرىس تاڭداۋى قاجەت. مىسالى، IT مامانى قازاق ءتىلى مەن ادەبيەتى ءپانى مۇعالىمدەرىن دايارلاۋ باعدارلاماسىنا قاتىسا المايدى. سونداي-اق 6 ايلىق كۋرس بارىسىندا جوو-لاردا 4 جىل وقىتاتىن بازالىق ءبىلىمدى ەمەس، ساباق بەرۋدىڭ زاماناۋي ادىستەمەسىن ۇيرەتەتىنىمىزدى اتاپ وتكىم كەلەدى. ياعني قاتىسۋشىنىڭ جوعارى، نە ورتا ءبىلىم ال¬عانىن راستايتىن قۇجاتى، ماماندىعى بويىنشا بازالىق ءبىلىمى بولۋى قاجەت. وعان قوسا اعىلشىن ءتىلىن كەم دەگەندە ا2 دەڭگەيىندە مەڭگەرۋى كەرەك. ونى راستايتىن سەرتيفيكات بولماعان جاعدايدا، ءوتىنىش بەرۋشى ۋنيۆەرسيتەتتە اعىلشىن تىلىنەن تەست تاپسىرادى. قازىرگى تاڭدا اقىلى بولسا دا كۋرسقا سۇرانىس جوعارى، الايدا الداعى ۋاقىتتا مەملەكەت تاراپىنان قولداۋ كورسەتىلۋ ىقتيمالدىعى بار. قىركۇيەك ايىندا كۋرستىڭ ءۇشىنشى لەگى جۇمىسىن باستايدى»، – دەپ ءتۇسىندىردى داۆرونجون گايپوۆ.
اتاپ وتەيىك، ۋنيۆەرسيتەت پەداگوگيكالىق باعىتتاعى مامانداردى دايارلاۋعا ەرەكشە كوڭىل بولەدى. جاڭادان اشىلعان «مەكتەپكە دەيىنگى ءبىلىم بەرۋ»، «باستاۋىش پەداگوگيكا جانە ادىستەمەسى»، «پەداگوگيكا جانە پسيحولوگيا»، «الەۋمەتتىك پەداگوگيكا» ءبىلىم بەرۋ باعدارلامالارى بولاشاق پەداگوگتەردى سىني تۇرعىدا ويلاۋعا، اناليتيكالىق تالداۋ جاساۋعا، عىلىمي-زەرتتەۋ جۇمىستارىنىڭ ناتيجەلەرىنە سۇيەنە وتىرىپ ءبىلىم بەرۋگە ۇيرەتەدى.
