Qazaqstanda jańa mektepter qarqyndy túrde salynyp jatyr, al maman tapshylyǵy áli de bar. Bul týraly Sýleıman Demırel atyndaǵy ýnıversıtettiń rektory Davronjon Gaıpov aıtty.
Onyń aıtýynsha, elimizde muǵalim tapshylyǵyn joıý maqsatynda qolǵa alynǵan qaıta daıarlaý kýrstary máseleni sheshýge septigin tıgizedi. Pedagogıkalyq bilimi joq mamandar kýrstan ótip, mektepte sabaq bere alady. Rektor joba qalaı júzege asyrylyp jatqanyn túsindirdi.
«Qazaqstanda jańa mektepter qarqyndy túrde salynyp jatyr, al maman tapshylyǵy áli de bar. Ásirese, ınformatıka, fızıka pánderiniń muǵalimderi suranysqa ıe. Ýnıversıtetimizdegi Biliktilikti arttyrý jáne ınnovaııa ortalyǵy osy baǵytta jumys isteıdi. Pedagogıkalyq qaıta daıarlaý kýrstaryn ótkizý – álemdik úderis. Bul – Anglııadaǵy PGCE baǵdarlamasynyń qazaqstandyq analogy bolyp tabylatyn zııatkerlik ónim. Aralas formatta ótetin alty aılyq oqytý kýrsyn sátti aıaqtaǵan tyńdaýshylarǵa mektepte muǵalim bolyp jumys isteýge quqyq beretin memlekettik úlgidegi sertıfıkat beriledi. Bizdiń ortalyqtyń basqalardan ereksheligi – praktıkaǵa baǵyttalǵan pedagogıkalyq komponentterdi beremiz. Sondaı-aq bul kýrstarǵa magıstranttar da qatysa alady», – dedi ol.
Bakalavr dıplomy qaıta daıarlaý baǵdarlamasynda óteıin dep jatqan pánderge sáıkes bolýy kerek. Mamandyǵy sáıkes kelmeıtin túlekter bul baǵdarlamaǵa qatysa almaıdy. Osy ýaqytqa deıin Pedagogıkalyq qaıta daıarlaý kýrsyna 17 maman qatysyp, onyń tek jeteýi sertıfıkattalǵan maman atandy.
Solardyń biri – matematık Qymbat Júsipova.
«Men Qaraǵandy oblysy Sátpaev qalasynda jekemenshik bilim berý ortalyǵyn ashtym, sonda matematıkadan sabaq beremin. Biliktiligimdi arttyrý maqsatynda, sabaq berýdiń jańa ádistemelerin úırený úshin 6 aılyq kýrsqa qatystym. Maǵan sabaqtar men emtıhandardyń onlaın formatta ótkeni tıimdi boldy. Ásirese, matematıka, XXI ǵasyrdaǵy kóshbasshylyq, psıhologııa sabaqtary maǵan erekshe unady. Kóp jyldan beri mektepte jumys istep júrgen ustazdarǵa zamanaýı formatta sabaq berýdi úırený úshin qaıta daıarlaýdan ótýge keńes beremin», – dedi ol.
QR Oqý-aǵartý mınıstri Ashat Aımaǵambetov bul bastama mektepke sapaly muǵalimderdi tartý maqsatynda júzege asyrylyp jatqanyn alǵa tartady.
«Mysaly, matematıka mamandyǵyn ıgergen, biraq pedagogıka boıynsha dıplom almaǵan mamandar bar. Endi zańnamaǵa engizilgen ózgeriske sáıkes, matematıkter pedagogıkany oqytatyn arnaıy kýrstan keıin mektepte muǵalim bola alady. Osy rásim boıynsha mektepke sapaly muǵalimderdi tartamyz. Pedagog bolýy kerek degen mindet joq. Basty shart – matematıkany jaqsy bilý», – dedi mınıstr.
SDÝ rektorynyń aıtýynsha, qazirgi tańda kýrsqa qatysýǵa nıet bildirýshiler kóp, alaıda, úmitkerler qatań irikteýden ótip, talapqa saı mamandar ǵana sertıfıkat alady.
«Kýrsqa qatysýshy óz baǵytyn durys tańdaýy qajet. Mysaly, IT mamany qazaq tili men ádebıeti páni muǵalimderin daıarlaý baǵdarlamasyna qatysa almaıdy. Sondaı-aq 6 aılyq kýrs barysynda JOO-larda 4 jyl oqytatyn bazalyq bilimdi emes, sabaq berýdiń zamanaýı ádistemesin úıretetinimizdi atap ótkim keledi. Iaǵnı qatysýshynyń joǵary, ne orta bilim al¬ǵanyn rastaıtyn qujaty, mamandyǵy boıynsha bazalyq bilimi bolýy qajet. Oǵan qosa aǵylshyn tilin kem degende A2 deńgeıinde meńgerýi kerek. Ony rastaıtyn sertıfıkat bolmaǵan jaǵdaıda, ótinish berýshi ýnıversıtette aǵylshyn tilinen test tapsyrady. Qazirgi tańda aqyly bolsa da kýrsqa suranys joǵary, alaıda aldaǵy ýaqytta memleket tarapynan qoldaý kórsetilý yqtımaldyǵy bar. Qyrkúıek aıynda kýrstyń úshinshi legi jumysyn bastaıdy», – dep túsindirdi Davronjon Gaıpov.
Atap óteıik, ýnıversıtet pedagogıkalyq baǵyttaǵy mamandardy daıarlaýǵa erekshe kóńil bóledi. Jańadan ashylǵan «Mektepke deıingi bilim berý», «Bastaýysh pedagogıka jáne ádistemesi», «Pedagogıka jáne psıhologııa», «Áleýmettik pedagogıka» bilim berý baǵdarlamalary bolashaq pedagogterdi synı turǵyda oılaýǵa, analıtıkalyq taldaý jasaýǵa, ǵylymı-zertteý jumystarynyń nátıjelerine súıene otyryp bilim berýge úıretedi.
