قر مەملەكەتتىك كەڭەسشىسى ەرلان قاريننىڭ توراعالىعىمەن سىبايلاس جەمقورلىققا قارسى ءىس-قيمىل ماسەلەلەرى جونىندەگى كوميسسيانىڭ وتىرىسى ءوتتى، دەپ جازادى "ادىرنا" ۇلتتىق پورتالى.
جيىندا قازاقستان رەسپۋبليكاسىنىڭ سىبايلاس جەمقورلىققا قارسى ساياساتىنىڭ 2022-2026 جىلدارعا ارنالعان تۇجىرىمداماسىنىڭ جۇزەگە اسىرىلۋى جانە ەۋروپا كەڭەسى جانىنداعى سىبايلاس جەمقورلىققا قارسى كۇرەس بويىنشا مەملەكەتتەر توبىنىڭ (گرەكو) ۇسىنىمدارى قاراستىرىلدى.
ءبىرىنشى ماسەلە بويىنشا ەرلان قارين سىبايلاس جەمقورلىققا قارسى جۇيەلى كۇرەس پرەزيدەنت رەفورمالارىنىڭ باسىم باعىتتارىنىڭ ءبىرى ەكەنىن ايتتى. وسى ورايدا جىل باسىندا 2022-2026 جىلدارعا ارنالعان سىبايلاس جەمقورلىققا قارسى ساياسات تۇجىرىمداماسى قابىلداندى. تۇجىرىمداما ستراتەگيالىق مىندەتتەرگە قول جەتكىزۋگە، سىبايلاس جەمقورلىقتىڭ العىشارتتارىن جويۋ جانە جەمقورلىق دەڭگەيىن تومەندەتۋ بويىنشا كەشەندى جۇمىس جۇرگىزۋگە، قوعامدا سىبايلاس جەمقورلىققا قارسى يممۋنيتەتتى قالىپتاستىرۋعا جانە حالىقتىڭ ءال-اۋقاتىن ارتتىرۋعا باعىتتالعان.
تۇجىرىمداما ينستيتۋتسيونالدىق جانە ناقتى باعىتتاردى قامتيدى. سونىمەن قاتار سىبايلاس جەمقورلىققا قارسى جاڭا تەتىكتەردى پىسىقتاۋدى، مەملەكەتتىك ورگاندار مەن ازاماتتىق قوعام سۋبەكتىلەرىن سىبايلاس جەمقورلىقتى جويۋ جونىندەگى جۇمىسقا قاتىستىرۋدى كوزدەيدى.
مەملەكەتتىك كەڭەسشى اتالعان جۇمىستىڭ ءتيىمدى ىسكە اسۋى ءتيىستى مەملەكەتتىك ورگاندار مەن ۇيىمداردىڭ جاۋاپكەرشىلىگىنە تىكەلەي بايلانىستى ەكەنىن اتاپ ءوتتى.
وسى ورايدا، كوميسسيا وتىرىسىندا تۇجىرىمدامانى ورىنداۋعا قاتىستى پروبلەمالار كورسەتىلىپ، سىن-ەسكەرتپەلەر ايتىلدى.
ەكىنشى ماسەلە بويىنشا ەلىمىزدىڭ حالىقارالىق سىبايلاس جەمقورلىققا قارسى گرەكو باستاماسىنا قاتىسۋ پەرسپەكتيۆاسى تالقىلاندى.
ەرلان كاريننىڭ پىكىرىنشە، گرەكو اياسىنداعى ءوزارا ءتيىمدى ىنتىماقتاستىق كوپتەگەن دامىعان ەلدەردە تاجىريبەدەن وتكەن جانە ىسكە اسىرىلىپ جاتقان سىبايلاس جەمقورلىققا قارسى ءىس-قيمىل تەتىكتەرىن قابىلداۋعا مۇمكىندىك بەرەدى.
وتىرىستا تالقىلانعان ماسەلەلەردى ەسكەرە وتىرىپ، كوميسسيا ناقتى ۇسىنىمدار ازىرلەدى. مەملەكەتتىك كەڭەسشى ەرلان قارين جيىن قورىتىندىسى بويىنشا بىرقاتار تاپسىرما بەردى.
"ادىرنا" ۇلتتىق پورتالى
