QR Memlekettik keńesshisi Erlan Qarınniń tóraǵalyǵymen Sybaılas jemqorlyqqa qarsy is-qımyl máseleleri jónindegi komıssııanyń otyrysy ótti, dep jazady "Adyrna" ulttyq portaly.
Jıynda Qazaqstan Respýblıkasynyń sybaılas jemqorlyqqa qarsy saıasatynyń 2022-2026 jyldarǵa arnalǵan tujyrymdamasynyń júzege asyrylýy jáne Eýropa Keńesi janyndaǵy sybaılas jemqorlyqqa qarsy kúres boıynsha memleketter tobynyń (GREKO) usynymdary qarastyryldy.
Birinshi másele boıynsha Erlan Qarın sybaılas jemqorlyqqa qarsy júıeli kúres Prezıdent reformalarynyń basym baǵyttarynyń biri ekenin aıtty. Osy oraıda jyl basynda 2022-2026 jyldarǵa arnalǵan sybaılas jemqorlyqqa qarsy saıasat tujyrymdamasy qabyldandy. Tujyrymdama strategııalyq mindetterge qol jetkizýge, sybaılas jemqorlyqtyń alǵysharttaryn joıý jáne jemqorlyq deńgeıin tómendetý boıynsha keshendi jumys júrgizýge, qoǵamda sybaılas jemqorlyqqa qarsy ımmýnıtetti qalyptastyrýǵa jáne halyqtyń ál-aýqatyn arttyrýǵa baǵyttalǵan.
Tujyrymdama ınstıtýıonaldyq jáne naqty baǵyttardy qamtıdy. Sonymen qatar sybaılas jemqorlyqqa qarsy jańa tetikterdi pysyqtaýdy, memlekettik organdar men azamattyq qoǵam sýbektilerin sybaılas jemqorlyqty joıý jónindegi jumysqa qatystyrýdy kózdeıdi.
Memlekettik keńesshi atalǵan jumystyń tıimdi iske asýy tıisti memlekettik organdar men uıymdardyń jaýapkershiligine tikeleı baılanysty ekenin atap ótti.
Osy oraıda, komıssııa otyrysynda Tujyrymdamany oryndaýǵa qatysty problemalar kórsetilip, syn-eskertpeler aıtyldy.
Ekinshi másele boıynsha elimizdiń Halyqaralyq sybaılas jemqorlyqqa qarsy GREKO bastamasyna qatysý perspektıvasy talqylandy.
Erlan Karınniń pikirinshe, GREKO aıasyndaǵy ózara tıimdi yntymaqtastyq kóptegen damyǵan elderde tájirıbeden ótken jáne iske asyrylyp jatqan sybaılas jemqorlyqqa qarsy is-qımyl tetikterin qabyldaýǵa múmkindik beredi.
Otyrysta talqylanǵan máselelerdi eskere otyryp, Komıssııa naqty usynymdar ázirledi. Memlekettik keńesshi Erlan Qarın jıyn qorytyndysy boıynsha birqatar tapsyrma berdi.
"Adyrna" ulttyq portaly
