يتاليادا دەنيس تەنگە ارنالعان كونتسەرت ۇكىلى ىبىرايدىڭ انىمەن باستالدى

يتاليادا دەنيس تەننىڭ رۋحىنا ارنالعان كونتسەرت ءوتتى «اكادەميا سوليستەرى» مەملەكەتتىك كامەرالىق وركەسترى يتاليانىڭ بەرگولو قالاسىندا وتكەن كونتسەرتىن قازا بولعان وليمپيادا جۇلدەگەرى دەنيس تەنگە ارنادى.  بۇل تۋرالى قازاقپارات حابارلايدى دەپ ktk.kz سايتى جاريا ەتتى. «قازاقكونتسەرت» مەملەكەتتىك ۇيىمىنىڭ «سوليستەر اكادەمياسى» كامەرالىق وركەسترىنىڭ كونتسەرتى قر مادەنيەت جانە سپورت مينيسترلىگىنىڭ قولداۋىمەن «Velia» مۋزىكالىق فەستيۆالى اياسىندا ءوتتى. كەش 1 مينۋت ۇنسىزدىكپەن باستالىپ، قازاقستاننىڭ xالىق ءارتىسى، «سوليستەر اكادەمياسىنىڭ» كوركەمدىك جەتەكشىسى ايمان مۇساقوجاەۆا دەنيس تەننىڭ قازاسىنا بايلانىستى قازاقستاندىقتار مەن ونىڭ تۋعان-تۋىستارىنا كوڭىل ايتتى. «جۇلدىزداي جارق ەتكەن دەنيس تەننىڭ مەزگىلسىز دۇنيەدەن ءوتۋى بارلىعىمىزعا اۋىر ءتيدى. بۇل جاعداي بارشا قازاق ەلى ءۇشىن اۋىر قايعى. سوندىقتان ءبىز فەستيۆال اياسىنداعى العاشقى كونتسەرتتى دەنيس تەننىڭ قۇرمەتىنە ارنادىق. جاس ءارى تالانتتى، قازاقستان مەن الەمنىڭ سۇيىسپەنشىلىگىنە بولەنىپ ۇلگەرگەن دەنيس ەلىمىزدەگى سپورتتىڭ دامۋىنا زور ۇلەس قوستى. ونىڭ ەسىمى، جەتىستىكتەرى مەن ەرەن ەڭبەگى جۇرەگىمىزدە ماڭگى ساقتالماق. ونىڭ جالىنى سونداي الاۋلاپ جاندى دا، سونداي ەرتە ءسوندى. جارقىن تۇلعا دەنيس تەن - ەلىمىزدىڭ جارىق جۇلدىزى. كونتسەرتكە كەلگەن يتاليالىق ونەر سۇيەر قاۋىمعا ءبىز دەنيس تۋرالى اڭگىمەلەپ، كونتسەرتتى سونىڭ قۇرمەتىنە ارنادىق»، - دەيدى ا.مۇساقوجاەۆا. ايمان مۇساقوجاەۆا سپورتشىنىڭ رۋحىنا ارناپ برامستىڭ، سەن-سانسەنىڭ، ۆاكسماننىڭ، ساراساتەنىڭ بەلگىلى كومپوزيتسيالارىن ورىندادى. سونىمەن قاتار، كونتسەرتتىڭ شىمىلدىعىن ۇكىلى ىبىرايدىڭ «قىزىل اسىق» انىمەن اشقان ءداستۇرلى ءانشى اسقار مۇقيات پەن وتاندىق وپەرا ءانشىسى ازات مالىك ابايدىڭ «كوزىمنىڭ قاراسى» ءانىن ورىنداپ، ەۋروپالىقتاردىڭ جوعارى باعاسىن الدى. ەكى ساعاتقا سوزىلعان كونتسەرت تالعامپاز كورەرمەننىڭ قوشەمەتىنە بولەندى.