قازىبەك يسا: ۇكىمەت تۇگەل ءبىر جاققا كەتىپ قالسا دا، ەشنارسە وزگەرمەيتىن جاعدايعا جەتسەك، ولاردىڭ نە كەرەگى بار؟

2292
Adyrna.kz Telegram
فوتو: Facebook
فوتو: Facebook

ۇشتىك” العان ۇكىمەت ءۇمىتتى اقتاي ما؟!

«جاڭا ۇكىمەتتىڭ جاڭاشا جۇمىسىن قاشان كورەمىز؟. اۋىل سول باياعى توزىپ بارادى. ءبىر سالاعا بىرنەشە باسشى بولسا دا، ءبىر-بىرىنە سىلتەپ، ەشكىم ەشنارسە شەشپەيدى. شەنەۋنىكتەر ەلمەن قالاي سويلەسۋدى بىلمەيدى. ۇكىمەتتىڭ ارەكەتسىزدىگى سونشا، ەگەر بارلىعىن اكىمدەرمەن قوسىپ بىرەر كۇن باسقا جاققا اكەتىپ قالسا دا، ەلدە ەشنارسە وزگەرمەيتىن جاعدايعا جەتتىك. ەندەشە ولاردىڭ نە كەرەگى بار؟..

بىزگە ەلدىڭ جاعدايىن جاقسارتاتىن، حالىقتىڭ تىلىندە سويلەسە الاتىن ۇلتتىق ۇكىمەت كەرەك!»

بۇل ءبىزدىڭ وسىدان تۋرا تۋرا ءتورت اي بۇرىن، 14 ناۋرىزدا پارلامەنتتە قاڭتار قىرعىنىنا بايلانىستى تىڭداۋ وتكىزىلگەندە سويلەگەن سوزىمىزدەن ءۇزىندى.

بۇل كەشە قر پرەزيدەنتى قاسىم-جومارت توقاەۆتىڭ ۇكىمەتتىڭ كەڭەيتىلگەن وتىرىسىندا ۇكىمەتتىڭ سىباعاسىن بەرگەن سىنىن تىڭداعاندا ەسىمىزگە ءتۇستى...

پرەمەر-مينيستر ءاليحان سمايىلوۆ ۇكىمەتتىڭ كەڭەيتىلگەن وتىرىسىندا ءى جارتىجىلدىقتاعى الەۋمەتتىك-ەكونوميكالىق دامۋ قورىتىندىسىن باياندادى.

جارتىجىلدىقتا جارىتىمدى تىرلىك بولماعانىن قر پرەزيدەنتى قاسىم-جومارت توقاەۆ قولمەن قويعانداي شەگەلەپ تۇرىپ كورسەتىپ بەردى.

“قازىر ينفلياتسيانىڭ شارىقتاپ كەتۋى ەڭ كۇردەلى ماسەلە بولىپ وتىر. باعانىڭ وسۋىنە ازىق-تۇلىك ينفلياتسياسى اسەر ەتتى. ونىڭ دەڭگەيى 19,2 پايىزعا جەتتى. جالپى، ازىق-تۇلىكتىڭ كەيبىر ءتۇرى بىردەن 80 پايىزعا قىمباتتادى. ۇكىمەتتىڭ باعانى تۇراقتاندىرۋعا باعىتتالعان شارالارى ءتيىمسىز بولىپ شىقتى. ۇكىمەت ينفلياتسيانى ەسكى ءادىس-تاسىلمەن توقتاتقىسى كەلەدى. ونىڭ وزىندە بيۋدجەتتەن قوسىمشا قاراجات ءبولىپ، باعانى جاساندى تۇردە عانا رەتتەپ وتىر. ياعني، قىمباتشىلىقتىڭ سەبەبىمەن ەمەس، سالدارىمەن كۇرەس ءجۇرىپ جاتىر»، - دەدى ول.

پرەزيدەنت بۇل باعىتتا جاڭا يدەيالاردىڭ جوقتىعىن سىنادى..

«ال، شىن مانىندە، كەرىسىنشە بولۋى كەرەك. ۇكىمەت بار جاۋاپكەرشىلىكتى وڭىرلەرگە ارتىپ قويدى. ولار اكىمشىلىك رەسۋرستى پايدالانىپ، دۇكەندەردى ارالاپ ءجۇر، باسقا تاسىلدەر جانە جاڭا يدەيالار جوق. مۇنداي جۇمىس ەشقاشان ءتيىمدى بولعان ەمەس. ءبىر سوزبەن ايتقاندا، نارىق زاڭدىلىعىنا ساي كەلەتىن جاڭا ۇستانىم جوق»، - دەدى مەملەكەت باسشىسى.

پرەزيدەنت ۇكىمەتتىڭ جارتىجىلدىق جۇمىسىنا «ۇشتىك» باعا قويدى. ءۇش مينيسترلىك – قر ۆيتسە-پرەمەرى -ساۋدا جانە ينتەگراتسيا ءمينيسترى باقىت سۇلتانوۆ، اۋىل شاراۋاشىلىعى ءمينيسترى ەربول قاراشوكەەۆ، ەكولوگيا، گەولوگيا جانە تابيعي رەسۋرستار ءمينيسترى سەرىكعالي برەكەشوۆ سوگىس ارقالادى. بۇل ءۇش مينيسترلىكتىڭ جۇمىسى قاناعاتتاندىرمايدى دەگەن ءسوز. ەندەشە ولار پورتفەلدەرىن جيناي باستاۋى ءتيىس... جالپى، ۇكىمەتتىڭ جۇمىسى وڭىپ تۇرماعانى كۇندەلىكتى ايقىن كورىنۋدە. كەشە عانا وڭىرلەردى ارالاپ كەلگەن دەپۋتاتتاردىڭ ەل الدىندا ادەتتەگىدەي ۇكىمەتتىڭ اۋىر كىنالارىن وزدەرى ارقالاۋىنا تۋرا كەلگەنى بەلگىلى... پرەزيدەنتتىڭ اسا مادەنيەتتى، اسقان ديپلومات ەكەنىن ەسكەرسەك، بۇل قويىلعان «ۇشتىك» باعانى ەش ويلانباي «ەكىلىك» دەپ قابىلداي بەرۋگە بولادى...

پرەزيدەنت سىنىندا ايتىلعان كۇردەلى ماسەلەلەردى “اق جول” فراكتسياسى تالايدان بەرى كوتەرىپ كەلە جاتىر.

ءيا، ءبىزدىڭ ۇكىمەتتە جاڭا داۋىرگە ساي جاڭا قارقىن، جاڭاشا جۇمىس، ەڭ باستىسى جاڭا سەرپىن جوق. سەرپىن جوق جەردە سەنىم جوق!
بۇدان كەيىن «ۇشتىكككە» زورعا ءىلىنىپ تۇرعان ۇكىمەتكە ءۇمىت قالادى ما؟

ەندەشە، وسىدان ءتورت اي بۇرىن پارلامەنتتە ايتقانىمىزداي، ۇكىمەتتىڭ ارەكەتسىزدىگى سونشا، ەگەر بارلىعىن اكىمدەرمەن قوسىپ بىرەر كۇن باسقا جاققا اكەتىپ قالسا دا، ەلدە ەشنارسە وزگەرمەيتىن جاعدايعا جەتتىك.
ەندەشە ولاردىڭ نە كەرەگى بار؟..

قازىبەك يسا

 

پىكىرلەر