الەۋمەتتىك جەلىلەردە دەپرەسسيا بەلگىلەرىن انىقتايتىن پيلوتتىق جوبا ىسكە قوسىلماق. بۇل تۋرالى قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ كەزەكتى وتىرىسىندا ايتىلدى، دەپ جازادى "ادىرنا" ۇلتتىق پورتالى.
كۇن تارتىبىندەگى نەگىزگى ماسەلەلەردىڭ ءبىرى كامەلەتكە تولماعاندار اراسىندا ءسۋيتسيدتىڭ الدىن الۋ شارالارى بولدى.
وتىرىستى اشقان ۇلتتىق كوميسسيانىڭ ءتورايىمى، پرەزيدەنت اكىمشىلىگى باسشىسىنىڭ ورىنباسارى ايدا بالاەۆا بالالار مەن جاسوسپىرىمدەر اراسىنداعى سۋيتسيد ماسەلەسى بۇگىنگى كۇنى قوعامىمىزدىڭ ەڭ وزەكتى الەۋمەتتىك پروبلەمالارىنىڭ ءبىرى بولىپ وتىرعانىن اتاپ ءوتتى. بۇل ءوز كەزەگىندە الدىن الۋ شارالارى كەشەنىن قالىپتاستىرۋدىڭ جاڭا تاسىلدەرىن ىزدەۋدى، سونداي-اق ۋاكىلەتتى ورگانداردىڭ بالالار ءسۋيتسيدىنىڭ الدىن الۋعا باعىتتالعان ءىس-قيمىلدارىنداعى پروبلەمالىق ايماقتاردى انىقتاۋدى جانە شەشۋدى تالاپ ەتەدى.
وتىرىستا مەملەكەت باسشىسىنىڭ تاپسىرماسى اياسىندا العاش رەت بالانى قۋدالاۋدىڭ (بۋللينگتىڭ) الدىن الۋ قاعيدالارى ازىرلەنىپ، ينتەرنەت جەلىسىندەگى زاڭسىز كونتەنتكە قارسى ءىس-قيمىل جونىندەگى نورمالار ەنگىزىلگەنى اتاپ ءوتىلدى. بالالار اماندىعىنىڭ يندەكسى قابىلداندى، ول بالالاردىڭ قۇقىقتارى مەن مۇددەلەرىنە، ونىڭ ىشىندە پسيحولوگيالىق ساۋلىعىنا جۇيەلى مونيتورينگ جۇرگىزۋگە مۇمكىندىك بەرەدى.
باس پروكۋروردىڭ ورىنباسارى ج.ومىراليەۆ ءوز بايانداماسىندا كامەلەتكە تولماعانداردىڭ سۋيتسيدتەرى جونىندەگى ىستەردى تەرگەۋدى قاداعالاۋ كۇشەيتىلگەنىن اتاپ ءوتتى. بۇل 2022 ج. ءبىرىنشى جارتى جىلىندا ءوز-وزىنە قول جۇمساۋ جاعدايلارىنىڭ (38,1%-عا) جانە ولاردىڭ ارەكەتتەرىنىڭ (5,7%-عا) تومەندەۋىنە ىقپال ەتكەن. 2021 جىلدىڭ قورىتىندىسى بويىنشا كامەلەتكە تولماعاندار اراسىندا سۋيتسيد جاساۋ مەن ونى جاساۋعا ارەكەتتەنۋ جاعدايلارىنىڭ 21,5%-عا وسكەنى بايقالعان.
كوپتەگەن ساراپشىلاردىڭ پىكىرىنشە، ءسۋيتسيدتىڭ وسۋىنە پسيحولوگتاردىڭ، تاۋەكەل توبىنداعى بالالارمەن جۇمىس جاسايتىن مامانداردىڭ بىلىكتىلىگى مەن دايىندىق دەڭگەيىنىڭ جەتكىلىكسىزدىگى ىقپال ەتەدى.
وسىعان بايلانىستى وقۋ-اعارتۋ مينيسترلىگى مەملەكەتتىك ورگانداردىڭ، جەرگىلىكتى اتقارۋشى ورگانداردىڭ جانە بارلىق ستەيكحولدەرلەردىڭ پروبلەمالاردى شەشۋدەگى كۇش-جىگەرىن بىرىكتىرۋدى ۇسىندى. «مينيسترلىك الەۋمەتتىك جەلىلەردىڭ اشىق جاريالانىمدارىندا دەپرەسسيانىڭ بەلگىلەرىن انىقتايتىن جاساندى ينتەللەكتىنى پايدالاناتىن پيلوتتىق جوبانى ىسكە قوسۋدى جوسپارلاپ وتىر»، - دەپ اتاپ ءوتتى وقۋ-اعارتۋ ۆيتسە-ءمينيسترى ع.بەيسەمباەۆ.
وتىرىس بارىسىندا ىشكى ىستەر مينيسترلىگى اكىمشىلىك پوليتسيا كوميتەتىنىڭ توراعاسى ا.ارىستانوۆ ءبىلىم بەرۋ ۇيىمدارىندا كامەلەتكە تولماعاندار اراسىندا سۋيتسيدتىك كورىنىستەردى ەرتە انىقتاۋ ادىستەمەسىن جەتىلدىرۋدى، سونداي-اق سۋيتسيدولوگتاردىڭ سانىن ارتتىرۋ ماسەلەسىن قاراستىرۋدى ۇسىندى.
ۇلتتىق كوميسسيانىڭ مۇشەسى، ادۆوكات، قۇقىق قورعاۋشى، «AU» ونلاين-قۇقىقتىق مەكتەبىنىڭ نەگىزىن قالاۋشى ا.وماروۆا باستاۋىش سىنىپتاردان بالالار ءۇشىن «مەنىڭ قاۋىپسىزدىگىم» ءپانىن، ال اتا-انالار مەن مۇعالىمدەر ءۇشىن ارنايى باعدارلامالار ەنگىزۋدى ۇسىندى.
سونداي-اق، سپيكەرلەر دياگنوستيكالىق جانە پسيحوتەراپيالىق قىزمەتتەر كورسەتەتىن مەديتسينالىق كابينەتتەر جەلىسىن كەڭەيتۋدى، جەرگىلىكتى اتقارۋشى ورگاندارعا ءبىلىم بەرۋ ۇيىمدارىنىڭ قىزمەتىن باعالاۋدىڭ كريتەريلەرىن پسيحولوگتاردىڭ ءتيىمدى قىزمەتىنە اسەر ەتەتىندەي ەتىپ قايتا قاراۋدى ۇسىندى. وتىرىس سوڭىندا ۇلتتىق كوميسسيا ءتورايىمى ا.بالاەۆا مەملەكەتتىك ورگاندارعا بىرقاتار تاپسىرمالار بەردى.
"ادىرنا" ۇلتتىق پورتالى
