"قاڭتار وقيعاسى" قايرات ساتىبالدى، ديكي ارمان جانە كارىم ءماسىموۆ تاراپىنان ماقساتتى تۇردە ۇيىمداستىرىلدى. بۇل پىكىردى بەلگىلى ادۆوكات ابزال قۇسپان "سۇراۋى بار" YouTube ارناسىنا بەرگەن سۇحباتىندا ايتتى، دەپ جازادى "ادىرنا" ۇلتتىق پورتالى.
"وتباسى مۇشەلەرى، سونىڭ ىشىندە ءدال قازىر قاماۋدا جاتقان قايرات ساتىبالدىدان باستاپ ەڭ نەگىزگى تۇلعا سول. "تسەنتروۆوي فيگۋرا" دەيدى عوي. ونىڭ كومانداسى مىقتى ەكەنىن بىلەمىز. ۇلتتىق قاۋىپسىزدىك كوميتەتىنىڭ وكىلدەرى بار، "ديكي" ارمان بار. ديكي ارماننىڭ ۇقك-مەن بايلانىسى بار ەكەنىن "قاڭتار وقيعاسى" بولماي-اق 2021 جىلدىڭ قاراشاسىندا اشىق ايتقانبىز. ول — قولدان جاسالعان "باتىر" ەدى عوي. ەشقانداي دا ۆور ۆ زاكونە ەمەس، ارنايى ءبىر قىلمىس الەمىنىڭ زاڭىنا سايكەس قىلمىس الەمىنىڭ سەركەسى ەمەس ، — دەيدى ادۆوكات.
ادۆوكاتتىڭ ايتۋىنشا، قايرات ساتىبالدى باستاعان توپ توقاەۆتىڭ قولىندا شوعىرلانىپ قالۋدان قاتتى قورىقتى.
"بۇلاردىڭ تاراپىنان ماقساتتى تۇردە ۇيىمداستىرىلعان دەپ ايتۋعا بولادى. تولىق نەگىز بار. وسى ارميا دايىن تۇردى. ولار شىن مانىندە دە توقاەۆتىڭ بيلىكتە بارا-بارا لەگاليزاتسياسى جۇزەگە اسىپ كەتەتىنەن قاتتى قاۋىپتەندى. قالاي بولعان جاعدايدا دا ءبىرىنشى پرەزيدەنتتىڭ جاسى كەلدى. ول كەز-كەلگەن ۋاقىتتا، كەز-كەلگەن ساتتە ء"بىر اياعى مىنا جاقتا بولسا، ءبىر اياعى انا جاقتا" كەتىپ قالۋى مۇمكىن. ول ەندى تابيعاتتىڭ زاڭى عوي. سول كەزدە توقاەۆ رەسمي تۇردە بيلىكتە قالىپ قويادى دەگەن قاۋىپ بولدى. سوندىقتان ولار دايىن وتىردى. وعان قاتىستى وتە كوپ دەرەكتەر بار", — دەيدى ابزال قۇسپان.
ابزال قۇسپاننىڭ سوزىنشە، "قاڭتار وقيعاسىنا" قايرات ساتىبالدى مەن ديكي ارماننان بولەك كارىم ءماسىموۆتىڭ دە تىكەلەي قاتىسى بار.
"كارىم ءماسىموۆ وتباسىعا سەندى. وتباسىنىڭ بەلگىلى ءبىر مۇشەلەرىنە ستاۆكا قويدى. سونىڭ ىشىندە قايرات ساتىبالدىعا ستاۆكا قويدى. وتباسىدا باسقا دا مۇشەلەر بار عوي. قىزدارى بار، كۇيەۋ بالالارى بار. سولاردىڭ ىشىندە بىراق الدەقايدا مىقتىلارى سول قايرات ساتىبالدى باستاعان توپ قوي", - دەيدى ادۆوكات.
"ادىرنا" ۇلتتىق پورتالى
