قازاقستان مۇنايىنىڭ 80%-ى كتك مۇناي قۇبىرى ارقىلى ەكسپورتقا شىعادى. ال رەسەي سوتى قۇجاتتىق زاڭ بۇزۋشىلىقتار ءۇشىن «كتك-ر» كومپانياسىنىڭ قىزمەتىن 30 تاۋلىككە توقتاتقان بولاتىن. بۇل قوعام بەلسەندىلەرىنىڭ اشۋىن تۋعىزدى. سولاردىڭ ءبىرى تاۋەلسىز جۋرناليست وڭعار قابدەن تەلەگرام ارناسىنا كتك قۇبىرى تۋرالى وقيعاعا بايلانىستى پىكىرىن ءبىلدىردى، دەپ حاباردايدى “ادىرنا” ۇلتتىق پورتالى.
“وسى ارقىلى قازاقستان ايىنا 500 ميلليون دوللار تابىس تاباتىن. رەسەيلىكتەر ءبىزدى وسى جەپ وتىرعان نانىمىزدان ايىردى. ونىمەن قويماي كولگىرسىپ انا لاۆروۆ دەگەندەرى قازاقستان ءبىزدىڭ ەڭ جاقىن دوسىمىز دەيتىندەرىن قايتەرسىڭ.
بۇنداي دوستىڭ بارىنان جوعى. كتك قۇبىرى بۇل ءبىزدىڭ جاندى جەرىمىز. سودان بولار بۇگىنگى جينالىستا توقاەۆ باستى باعىت – ترانسكاسپي باعىتى دەپتى.
جاقىندا عانا توقاەۆتىڭ يرانعا ساپار شەگىپ، ارتىنان تۇركىمەنگە تابان تىرەپ اركاداگتى وردەنمەن ماراپاتتاپ قايتقانىن ەسكەرسەك بولاشاقتا ءبىزدىڭ مۇنايدىڭ قۇبىرى ءازىربايجان، تۇركىمەنستان مەن يران باعىتىنا بۇرىلاتىن سياقتى”،-دەپ جازدى وڭعار قابدەن.
سونداي-اق، توقاەۆتىڭ تەڭىز جوباسىنا ينۆەستورلار تارتۋ مۇمكىندىگى تۋرالى ويىنا دا پىكىرىن قوسا كەتتى.
باعانا عانا "قازمۇنايگازعا" رەاليزاتسيانى دۇرىستاپ جۇرگىزىڭدەر، تەڭىز جوباسىنا ينۆەستورلار تارتۋ مۇمكىندىگى بار دەگەن ءسوزى ورىستاردىڭ توبە شاشىن تىك تۇرعىزدى. بۇل دەگەن ءسوز ءبىز رەسەي باعىتىنداعى قۇبىردى كەرەك ەتپەي باسقا جاقتان قۇبىر تارتامىز دەگەن نامەك. رەسەي قيت ەتسە كراينيكتى جابامىز دەپ، اينالاسىن دا، ەۋروپانى دا مەزى قىلىپ ەدى. ەندى تەزىرەك ينۆەستور كەلىپ، ترانسكاسپي جوباسىن ىسكە اسىرساق ەكەن. ەشكىمگە جالتاقتاماي ءوز مۇنايىمىزعا ءوزىمىز ەگە بولار ەدىك. باتىستاعى جۇمىس ىزدەگەن اعايىننىڭ جۇمىسسىزدىق ماسەلەسى دە شەشىمىن تابار ەدى.
كورىنگەن يت پەن بيتكە قور بولعان قازاقتىڭ مۇنايى-اي”، - دەدى ول.
“ادىرنا” ۇلتتىق پورتالى
