نۇر-سۇلتان قالاسىندا اۋا رايىنىڭ قولايسىزدىعىنان اۋە شارىن جەل ۇشىرىپ اكەتتى. بۇل تۋرالى قالالىق تجد ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
سونىمەن قاتار، وقيعا ورنىنان كۋاگەرلەر ۆيدەو ءتۇسىرىپ العان. Astanovka98 Telegram-ارناسى كادرلاردى ءبولىستى.
قۇلاعان ساتتە شار سەبەتىندە ەرەسەكتەرمەن قاتار بالالار دا بولعان. جەرگە تۇسكەن بويدا اۋە شارىن جەل الىپ كەتپەس ءۇشىن بىرنەشە ادام ونى ۇستاپ قالۋعا ارەكەت ەتەدى.
"قازا بولعاندار مەن زارداپ شەككەندەر جوق. 112 قىزمەتىنە بۇل وقيعا بويىنشا ەشقانداي اقپارات تۇسكەن جوق", - دەدى دەپارتامەنتتىڭ ءباسپاسوز قىزمەتى.
ايتا كەتەيىك، قالالىق تجد 6 شىلدە كۇنى كۇن رايىنىڭ قولايسىز بولاتىنىن حابارلاعان بولاتىن. وسىعان وراي توتەنشە جاعدايلار قىزمەتى ازاماتتاردى اباي بولۋعا شاقىرادى.
“ادىرنا” ۇلتتىق پورتالى
