وبلىس باسشىلىعىنىڭ باستاماسىمەن مەديتسينا عىلىمدارىنىڭ دوكتورى 38 جىلدىق تاجىريبەسى بار نۇرلان ارىن تالدىقورعان قالاسىنا بالالارعا كۇردەلى وپەراتسيالاردى تەگىن جۇرگىزۋ ءۇشىن كەلدى. بالالار اۋرۋحاناسىندا ول «وكپە جانە باۋىر ەحينوكوككوزى، كولوستوما، توق ىشەك اناستوموزى»دياگنوزىمەن جاتقان 7 جاستان 16 جاسقا دەيىنگى بالالارعا ءساتتى وتا جاسادى. كۇردەلى وتالاردى جاساي وتىرىپ، پروفەسسور جەرگىلىكتى دارىگەرلەرمەن كوپ جىلدىق تاجىريبەسىمەن ءبولىستى.
- قۇرمەتتى جەرلەستەر، جەتىسۋلىقتار. مەن ءوز جەرىمدە بولعانىما وتە قۋانىشتىمىن. مەن مۇندا ءبىرىنشى رەت جانە سوڭعى رەت وپەراتسيا جاساۋعا كەلىپ تۇرعانىم جوق. وسى جىلدىڭ بالالار جىلى رەتىندە جاريالانعانىن ەسكەرە وتىرىپ، ءبىز بالالارعا قايىرىمدىلىق وپەراتسيالارىن جۇرگىزۋدى ۇيعاردىق. ءبارى ءساتتى وتەدى دەپ سەنەمىن. ءبىزدىڭ بالالارىمىز اۋىرماسىن، دەنى ساۋ بولسىن، - دەدى نۇرلان ارىن.
ۇيىمداستىرۋشىلاردىڭ مالىمەتىنشە، «بالالار جىلى» اياسىندا جەتىسۋ وبلىسىنىڭ بالالارىنا كونسۋلتاتيۆتىك-دياگنوستيكالىق جانە حيرۋرگيالىق مەديتسينالىق كومەك كورسەتىلەدى.
ەستەرىڭىزگە سالا كەتەيىك، پروفەسسور نۇرلان ارىنوۆ «تۋعان ەلگە تاعزىم» اياسىندا وبلىستىڭ مەديتسينالىق مەكەمەلەرىندە شەبەرلىك ساباعىن وتكىزەدى. وسى ۋاقىتقا دەيىن نۇرلان مۇحتارۇلى 25 مىڭنان استام وپەراتسيا جاساعان. ونىڭ ىشىندە 1,5 مىڭنان استامى قايىرىمدىلىق وپەراتسيالارى. دارىگەر سونىمەن قاتار 300 عىلىمي ماقالا مەن 7 مونوگرافيانىڭ اۆتورى.
ايتا كەتۋ كەرەك، بالالاردىڭ وتا الدىنداعى دايىندىعى ءبىر اپتا بۇرىن باستالدى.
