پاۆلودار قالاسىندا جاڭا قازاق ءتىلدى مەكتەپ-ليتسەيى بوي كوتەردى. قازىر وقۋشىلار قابىلدانۋدا. جاڭا وقۋ جىلىنان ەسىگى ايقارا اشىلادى. بۇل تۋرالى كەشە، پاۆلودار وبلىسىنىڭ اكىمى ابىلقايىر سقاقوۆ رەسپۋبليكالىق باق وكىلدەرىنە بەرگەن بريفينگى بارىسىندا ءمالىم ەتتى.
ەرتىس-بايان وڭىرىندە جىل ساناپ قازاق ءتىلدى مەكتەپتەرگە دەگەن سۇرانىس ارتىپ كەلەدى. رەسمي ستاتيستيكاعا جۇگىنسەك، بۇگىندە وبلىس بويىنشا بارلىعى 359 مەكتەپ بولسا، ونىڭ 138-ءى، ياعني 39%-ىنىڭ وقىتۋ ءتىلى – قازاق ءتىلى. سوڭعى بەس جىلدا مەملەكەتتىك تىلدە ءبىلىم بەرەتىن مەكتەپتەردىڭ قاتارى ارتقان. سونىڭ ىشىندە ءتورت ارالاس مەكتەپ تولىعىمەن قازاق تىلىنە اۋىستى.
ەندى مىنە، بۇل ءتىزىم تاعى ءبىر سۋ جاڭا ءبىلىم ورداسىمەن تولىقپاق. پاۆلودار قالاسىندا جاڭادان سالىنعان «سارىارقا» شاعىن اۋدانىندا ورىن تەپكەن مەكتەپ تۇساۋى بيىل كۇزدە كەسىلەتىن بولدى. بۇل وبلىس ورتالىعىنداعى ليتسەي دارەجەسى بار العاشقى قازاق ءتىلدى مەكتەپ بولماق.
«مەكتەپ قۇرىلىسى تولىعىمەن اياقتالدى. مۇندا ءبىر اۋىسىمدا 650 وقۋشى ءبىلىم الاتىن بولادى. نىسان الداعى جاڭا وقۋ جىلىنان باستاپ رەسمي تۇردە جۇمىسىن باستايدى. قازىر وقۋشىلاردى تىركەۋ بويىنشا ءتيىستى وتىنىشتەر قابىلدانۋدا. الەۋمەتتىك، ءبىلىم سالاسىنا جاۋاپتى ماماندار ءتيىستى تالداۋ جۇرگىزدى. سۇرانىسقا وراي بۇل مەكتەپتە مەملەكەتتىك تىلدە ءبىلىم بەرۋلەتىن بولادى»، - دەدى ايماق باسشىسى ءا.سقاقوۆ رەسپۋبليكالىق ورتالىق كوممۋنيكاتسيالار قىزمەتىندە سويلەگەن سوزىندە.
قازاق ءتىلدى مەكتەپتەرگە دەگەن سۇرانىستىڭ ارتقانىن پاۆلودار وبلىسىنىڭ ءبىلىم بەرۋ باسقارماسىنداعىلار كەلتىرگەن مىنا ءبىر مىسالدان ايقىن بايقاۋعا بولادى. پاۆلودار قالاسىندا باۋىرجان مومىشۇلى اتىنداعى ءبىلىم ورداسىندا 700-گە جۋىق وقۋشى ارتىق وقيدى. ياعني، جۇكتەمە تىم جوعارى. مەكتەپتىڭ ءۇش اۋىسىمعا ءوتۋ قاۋپى تۋىنداۋدا. بۇل ونداعى ءبىلىم ساپاسىنا، سانيتارلىق جاعدايعا كەرى اسەرىن تيگىزەرى ءسوزسىز. سوندىقتان اتالعان ءبىلىم بەرۋ ورداسىنىڭ ءبىراز وقۋشىلارى اتا-انالاردىڭ كەلىسىمى بويىنشا «سارىارقا» شاعىن اۋدانىنداعى جاڭادان بوي كوتەرگەن ليتسەي-مەكتەبىنە اۋىستىرىلماق. بۇل ەكى مەكتەپ ءبىر-بىرىنە جاقىن ورنالاستىرىلعان.
