قازاقستان شاحمات فەدەراتسياسىنىڭ ءباسپاسوز قىزمەتى ءبيبىسارا اساۋباەۆنىڭ مالىمدەمەسىنە قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
«فەدەراتسيا جۇمىسى ءۇشىن مەملەكەتتەن ەشقانداي قارجى سۇرالمادى. مەملەكەت باسشىسىمەن جانە اكىمشىلىكپەن كەزدەسۋ كەزىندە قر شاحمات تۇجىرىمداماسى قاراستىرىلدى. بۇل بىرنەشە مارتە جاريالاندى. وعان دالەل رەتىندە، قازاقستاننىڭ مادەنيەت جانە سپورت ءمينيسترى داۋرەن اباەۆ، قشف پرەزيدەنتى عالىم حۋساينوۆ، ۆيتسە-پرەزيدەنت دارمەن سادۋاقاسوۆ، جانسايا ابدىمالىك مالىمدەمە جاسادى»،– دەلىنگەن حابارلامادا.
فەدەراتسيا قاسىم-جومارت كەمەلۇلىنىڭ قازاقستانداعى شاحماتتى دامىتۋ باستاماسىن قولدايتىنىن اتاپ ءوتتى.
«مەكتەپ قابىرعاسىنداعى شاحمات، مۋنيتسيپالدى كلۋبتار، وقىتۋشىلاردى دايارلاۋ جۇمىستارىن قشف قارجىلاندىرا المايدى. مۇنىمەن ارنايى مينيسترلىكتەر اينالىسادى. قازىرگى ۋاقىتتا سپورتشىلار مەن فەدەراتسيانىڭ باستى نازارى ۇندىستانداعى وليمپياداعا دايىندالۋعا باعىتتالعان. ءبىز بۇقارالىق اقپارات قۇرالدارىنان بۇل تاقىرىپتى ەندى تالقىلاماۋدى جانە ودان دا ماڭىزدى ىستەرگە نازار اۋدارۋعا مۇمكىندىك بەرۋدى سۇرايمىز»،– دەپ قورىتىندىلادى قشف.
ەسكە سالا كەتەيىك، بۇعان دەيىن ءبيبىسارا اساۋباەۆا فەدەراتسيا «پرەزيدەنت اكىمشىلىگىنەن اقشا سۇراۋعا تانىمال سپورتشىلاردى پايدالانادى» دەپ حابارلاعان بولاتىن. كەيىن سپورتشى باسشىلارىمەن بىرگە دەتەكتوردان وتۋگە دايىن ەكەنىن دە ايتتى.
