نۇر-سۇلتاندا حالىقارالىق تۇركى اكادەمياسى عىلىمي كەڭەسىنىڭ كەزەكتى V وتىرىسى ءوتتى

3289
Adyrna.kz Telegram

بۇگىن نۇر-سۇلتان قالاسىندا حالىقارالىق تۇركى اكادەمياسى عىلىمي كەڭەسىنىڭ كەزەكتى V وتىرىسى ءوتتى.

القالى جيىنعا تۇركى مەملەكەتتەر ۇيىمىنىڭ باس حاتشىسى باعدات امىرەەۆ، حالىقارالىق تۇركى اكادەمياسىنىڭ باسشىسى دارحان قىدىرالى، ازەربايجان رەسپۋبليكاسىنىڭ ءبىلىم ءمينيسترى ەمين امرۋللاەۆ، قازاقستان رەسپۋبليكاسىنىڭ وقۋ-اعارتۋ ءمينيسترى اسحات ايماعامبەتوۆ، قازاقستان رەسپۋبليكاسىڭ عىلىم جانە جوعارعى وقۋ ءمينيسترى ساياسات نۇربەك، قىرعىز رەسپۋبليكاسىنىڭ ءبىلىم جانە عىلىم ءمينيسترى المازبەك بەيشەناليەۆ، وزبەكستان رەسپۋبليكاسىنىڭ قازاقستانداعى ەلشىسى سايديكرام نيازحودجاەۆ، سونىمەن قاتار ازەربايجان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى اعالار اتاموعلانوۆ، رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى داستان ديۋشەكەەۆ، تۇركى مەملەكەتتەرى ۇيىمى اقساقالدار كەڭەسىنىڭ مۇشەسى يكرام ادىربەكوۆ، ماجارستان مەن تۇركيا ەلشىلىگىنىڭ ديپلوماتتارى قاتىستى.

جيىندا اكادەميا باسشىسى 2021 جىلى اتقارىلعان جۇمىستاردىڭ ەسەبىن بەرىپ، 2022 جىلدىڭ جۇمىس جوسپارىمەن تانىستىردى.

باسقوسۋ بارىسىندا تۇركيا تاراپى حالىقارالىق تۇركى اكادەمياسى عىلىمي كەڭەسىنە توراعالىق مىندەتىن قازاقستانعا تابىستادى. اتقارىلعان جۇمىستارعا جوعارى باعا بەرگەن عىلىمي كەڭەس مۇشەلەرى اكادەميانىڭ 2022 جىلعى جۇمىس جوسپارىن بەكىتىپ، كەلەسى وتىرىستىڭ ورنى مەن ۋاقىتى جونىندە ۋاعدالاستى.

قازاقستاننىڭ عىلىم جانە جوعارعى وقۋ ءمينيسترى ساياسات نۇربەك توراعالىق ەتكەن كەڭەس مۇشەلەرى بىرقاتار ماسەلەلەر بويىنشا ناقتى شەشىمدەر قابىلدادى. اتاپ ايتقاندا، تۇركى الەمىنىڭ مەرەيلى داتالار ءتىزىمى، ورتاق وقۋلىقتار، ءبىلىم جانە عىلىم سالاسىنداعى ىنتىماقتاستىق ماسەلەلەرى، عىلىمي-زەرتتەۋ جوبالارى تالقىلانىپ، باسىم باعىتتارى ماقۇلداندى.

ايتا كەتۋ كەرەك، 2022 جىلعى تۇركى الەمىنىڭ ايتۋلى داتالارى قاتارىندا ۇلت ۇستازى احمەت بايتۇرسىنىڭ 150 جىلدىعى، مۇحتار اۋەزوۆتىڭ 125 جىلدىعى، ازەربايجان اعارتۋشىسى حۋسەين ءجاۆيدتىڭ 140, ازەربايجان ءانۇرانى ءسوزىنىڭ اۆتورى احمەد دجاۆادتىڭ 130 جىلدىعى، قىرعىز مەملەكەت قايراتكەرى يشەنالى اراباەۆ 140 جىلدىعى، سۇلەيمەن چەلەبيدىڭ دۇنيەدەن وتكەنىنە 600 جىل تولۋى، سونداي-اق باسقا دا تۇعىرلى تۇلعالار مەن ماڭىزدى وقيعالارعا قاتىستى مەرەيتويلار بار.

 

پىكىرلەر