الماتى قالاسى بويىنشا ەكونوميكالىق تەرگەۋ دەپارتامەنتى «رەيدەرلىك» بابى بويىنشا ۇستىنەن ءىز قوزعالعان مايرا قۇرمانعاليەۆا (بولات نازارباەۆتىڭ زايىبى) وتكەن سەنبىدە رايىمبەك اۋدانىنداعى اتاقتى شۇبارتال جايلاۋىندا اناسىنىڭ 90 جىلدىق مەرەيتويىن دۇركىرەتىپ اتاپ ءوتتى، دەپ حابارلايدى «ادىرنا» ۇلتتىق پورتالى.
"nege.kz" سايتىنىڭ جازۋىنشا، الگى تويعا قوناقتار قازاقستاننىڭ ءار جەرىنەن كەلىپتى. اسىرەسە، اتبەگىلەر تۇلپارلارىن باپتاپ، ارنايى جەتكەن. ويتكەنى بايگەگە بىرنەشە كولىك تىگىلگەن.
«جۇمادان باستاپ ءبىزدىڭ اۋداندى قوناقتار باسىپ قالدى. الماتى جاقتان اعىلعان كولىكتەر ىركەس-تىركەس بولىپ، شۇبارتال جايلاۋىنا قاراي ورلەپ جاتتى. نەبىر قىمبات كولىكتەر ارنايى تىركەمەمەن بايگە اتتارىن الىپ كەلدى. اۋىلدىڭ اتتارىن بايگەگە بولەك قوستى، قالالىق تۇلپارلار بولەك شاپتى. جورعا جارىس، قۇنان بايگەنى دە تاماشالادىق. بايگەدەن ءبىرنشى كەلگەندەردىڭ ءبارى كولىك ءمىندى. كۇرەسكەن پالۋاندار دا جۇلدەسىز قالعان جوق»، – دەيدى توي كۋاگەرى.
تۇرعىنداردىڭ ايتۋىنشا، تويدىڭ ءماندى دە ءساندى وتۋىنە رايىمبەك اۋدانىنىڭ اكىمدىگى اتسالىسقان. اۋدانداعى ون ءبىر اۋىلدىق وكرۋگ ءبىر-ءبىر كيىز ۇيدەن تىگىپ بەرىپتى. الايدا الماتى وبلىسى اكىمدىگىنىڭ وكىلدەرى بۇل اقپاراتتى جوققا شىعاردى. ولاردىڭ ايتۋىنشا، تويعا تەك اۋىل بەلسەندىلەرى عانا اتسالىسقان.
تويدىڭ دۇركىرەپ وتۋىنە ەسترادا انشىلەرى ۇلەس قوسقان. ماسەلەن، ءانشى ءمادينا سادۋاقاسوۆا تويدان كورىنىستەردى ءوزىنىڭ الەۋمەتتىك جەلىدەگى پاراقشاسىنا سالعان.
«مايرانىڭ ءوزىن كورمەدىك. ەستۋىمىزشە، ءوزى تويعا كەلە الماعان. «ۇستىنەن قىلمىستىق ءىس قوزعالعان» دەي مە، ايتەۋىر جۇرت ونى ءالى دە شەتەلدە ەكەن دەپ ءجۇر. اناسى مەن باۋىرلارى، تۋىستارى تويدا ءجۇردى. ال ءوزىن كورمەدىك»، – دەدى كۋاگەر.
«ادىرنا» ۇلتتىق پورتالى
