Bolat Nazarbaevtyń zaıyby Maıra anasyna dúrkiretip toı ótkizdi

2538
Adyrna.kz Telegram
Foto: ashyq derekkóz
Foto: ashyq derekkóz

Almaty qalasy boıynsha Ekonomıkalyq tergeý departamenti  «Reıderlik» baby boıynsha ústinen iz qozǵalǵan Maıra Qurmanǵalıeva (Bolat Nazarbaevtyń zaıyby) ótken senbide Raıymbek aýdanyndaǵy ataqty Shubartal jaılaýynda anasynyń 90 jyldyq mereıtoıyn dúrkiretip atap ótti, dep habarlaıdy «Adyrna» ulttyq portaly.

"nege.kz" saıtynyń jazýynsha, álgi toıǵa qonaqtar Qazaqstannyń ár jerinen kelipti. Ásirese, atbegiler tulparlaryn baptap, arnaıy jetken. Óıtkeni báıgege birneshe kólik tigilgen.

«Jumadan bastap bizdiń aýdandy qonaqtar basyp qaldy. Almaty jaqtan aǵylǵan kólikter irkes-tirkes bolyp, Shubartal jaılaýyna qaraı órlep jatty. Nebir qymbat kólikter arnaıy tirkememen báıge attaryn alyp keldi. Aýyldyń attaryn báıgege bólek qosty, qalalyq tulparlar bólek shapty. Jorǵa jarys, qunan báıgeni de tamashaladyq. Báıgeden birnshi kelgenderdiń bári kólik mindi. Kúresken palýandar da júldesiz qalǵan joq», – deıdi toı kýágeri.

Turǵyndardyń aıtýynsha, toıdyń mándi de sándi ótýine Raıymbek aýdanynyń ákimdigi atsalysqan. Aýdandaǵy on bir aýyldyq okrýg bir-bir kıiz úıden tigip beripti. Alaıda Almaty oblysy ákimdiginiń ókilderi bul aqparatty joqqa shyǵardy. Olardyń aıtýynsha, toıǵa  tek aýyl belsendileri ǵana atsalysqan.

Toıdyń dúrkirep ótýine estrada ánshileri úles qosqan. Máselen, ánshi Mádına Sádýaqasova toıdan kórinisterdi óziniń áleýmettik jelidegi paraqshasyna salǵan.

«Maıranyń ózin kórmedik. Estýimizshe, ózi toıǵa kele almaǵan. «Ústinen qylmystyq is qozǵalǵan» deı me, áıteýir jurt ony áli de shetelde eken dep júr. Anasy men baýyrlary, týystary toıda júrdi. Al ózin kórmedik», – dedi kýáger.

 

«Adyrna» ulttyq portaly

Pikirler