تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين ەلىمىز ءۇشىن «ياندەكس. تاكسي» سياقتى جوبا جاساۋ ءتيىمدى بولمايتىنىن ايتتى، دەپ حابارلايدى «ادىرنا» ۇلتتىق پورتالى «turkystan.kz»-كە سىلتەمە جاساپ.
«قازاقستان ءۇشىن «ياندەكس. تاكسي» سياقتى جوبا جاساۋ ءتيىمدى بولمايدى. جەر شارىندا تانىمال جوبا بولۋى كەرەك. DIDI دەگەن تاكسي جوباسى بىزگە كىرەيىن دەدى. الايدا ولار كىرە المادى. قىتايدىڭ قانشا قاراجاتى بولسا دا، ءبىزدىڭ نارىققا كىرىپ، «ياندەكسكە» توتەپ بەرە المادى. ول ميللياردتاعان قاراجاتتى تالاپ ەتەدى. ونى مەملەكەت بولە المايدى. ول قارجىنى ۆەنچۋرلىق ينۆەستورلاردان تارتۋ كەرەك. ۆەنچۋرلىق ينۆەستورلار دۇنيەجۇزى بويىنشا ونداي قىزىقتى جوبالاردى وزدەرى ىزدەستىرەدى. جاساندى ينتەللەكت، كارتالار بويىنشا جاسالىپ جاتقان جاڭا جوبالارعا قارجى قۇيعىسى كەلەدى»، – دەدى باعدات مۋسين.
ءمينيستردىڭ سوزىنشە، تەك قازاقستان ءۇشىن ءبىر جوبا جاساۋ تسيفرلاندىرۋ تۇرعىسىنان ءتيىمسىز. سونداي-اق ول شەتەلدەگى قازاقستاندىق IT ماماندارىنىڭ باسىن قوسىپ، ەلىمىزگە كەرەكتى ونىمدەردىڭ تيىمدىلىگىن تالقىلاپ جاتقانىن جەتكىزدى.
«ادىرنا» ۇلتتىق پورتالى
