ەلوردا اۋماعىندا “قاراسورا – 2022” رەسپۋبليكالىق جەدەل الدىن الۋ ءىس-شاراسى اياسىندا اسا ءىرى كولەمدە ەسىرتكى جەتكىزۋمەن جانە وتكىزۋمەن اينالىساتىن ادامداردى ۇستاۋ بويىنشا ارنايى وپەراتسيا جۇرگىزىلدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
ەسىرتكىنى وتكىزۋ ارناسىنىڭ جولىن كەسۋگە باعىتتالعان جەدەل-ىزدەستىرۋ ءىس-شارالارىن جۇرگىزۋ كەزىندە پەتروۆ كوشەسىندە ەلوردانىڭ 50 جاستاعى تۇرعىنى ۇستالدى. ايەل ادامنىڭ جەكە زاتتارىن ءتىنتۋ بارىسىندا سومكەسىنەن سالماعى 400 گرامم بولاتىن ساتۋعا دايىندالعان “گاشيش” جانە “ماريحۋانا” ەسىرتكى زاتتارى تابىلدى. ودان كەيىن پاتەردى ءتىنتۋ بارىسىندا ونىڭ 47 جاستاعى كۇيەۋى ۇستالدى. ول ءوز ەركىمەن بالكوندا ساقتالعان 10 كەلىگە جۋىق “گاشيش” جانە 1,5 كەلىگە جۋىق “ماريحۋانا” ەسىرتكى زاتتارىن بەردى.
سونىمەن قاتار بوتالى كوشەسىنىڭ بويىندا ەسىرتكى ساتۋعا قاتىسى بار وتباسىلىق جۇپتىڭ سىبايلاسى، 25 جاستاعى ەر ادام ۇستالدى. ونى جەكە ءتىنتۋ جانە اۆتوكولىگىن ءتىنتۋ بارىسىندا “ماريحۋانا” ەسىرتكى زاتى تاركىلەنگەن. تاركىلەنگەن ەسىرتكىنىڭ جالپى سالماعى 11 كيلوگرامنان استى.
اتالعان فاكتى بويىنشا قر قك-ءنىڭ 297-بابى 3-بولىگى “ەسىرتكى زاتتاردى، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، ساتىپ الۋ، ساقتاۋ، تاسىمالداۋ، جونەلتۋ نەمەسە وتكىزۋ” بويىنشا سوتقا دەيىنگى تەرگەۋ جۇرگىزىلۋدە.
