ماۋسىمنىڭ ءۇشى كۇنى الماتى اكىمدىگىنىڭ كاسىپكەرلىك جانە ينوۆاتسيالار باسقارماسى «الماتى حالىقارالىق اۋەجايى» اق-مەن 182,3 ملن تەڭگە جانە Sanzheli جشس-مەن 15,1 ملن تەڭگە تىكەلەي ءبىر كوزدەن ساتىپ الۋ ءتاسىلى ارقىلى كەلىسىمشارت جاساستى. مەمساتىپ الۋ پورتالىنداعى اقپاراتقا قارعاندا، ەكى كەلىسىمشارت تا «قاڭتار قىرعىنى» كەزىندە قازاقستان بيلىگىنىڭ شاقىرتۋىمەن ەلگە كىرگەن ۇجىمدىق قاۋىپسىزدىك شارتى ۇيىمىنىڭ (ۇقشۇ) اسكەرىنە جۇمسالعان شىعىندى وتەۋ ماقساتىندا جاسالعان. بۇل تۋرالى ميات كاشىباي Telegram ارناسى جازدى، دەپ حابارلايدى «ادىرنا» ءتىلشىسى.
ەكى كەلىسىمشارتتىڭ دا تەحسيپاتتاماسىنادا الماتى اكىمى ەربولات دوساەۆتىڭ قاۋلىسى تۇر. قاۋلىدا: «الماتى قالاسى ستراتەگيا جانە بيۋدجەت باسقارماسى كاسىپكەرلىك جانە ينوۆاتسيالار باسقارماسىنا جەرگىلىكتى اتقارۋشى ورگاننىڭ شۇعىل شىعىندارعا ارنالعان رەزەرۆىنەن جالپى سومماسى 197 454 551 تەڭگە ءبولسىن، ونىڭ ىشىندە ۇشقۇ-نىڭ ۇجىمدىق بىتىمگەرشىلىك كۇشتەرى مۇشەلەرىن تاماقتاندىرۋ جونىندەگى شىعىندى وتەۋگە 15 127 542 تەڭگە، سونداي-اق توتەنشە جاعداي كەزەڭىندە ۇقشۇ-نىڭ بىتىمگەرشىلىك وپەراتسياسىن جۇرگىزۋ كەزىندە اۋەايلاقتىق جانە جەر ۇستىندە قىزمەت كورسەتۋ بويىنشا كورسەتىلگەن قىزمەتتەر ءۇشىن 182 327 009 تەڭگە قارجات ءبولسىن»،- دەلىنگەن.
«قاڭتار قىرعىنى» كەزىندە ەل اۋماعىنا ۇقشۇ-نىڭ 2 مىڭ اسكەرى كىرگەنى بەلگىلى. مىنا قاۋلىعا قاراعاندا، ۇقشۇ اسكەرىنىڭ شىعىنىن قازاقستان كوتەرگەن. ال ۇقشۇ جارعىسىنىڭ ۇيىمدى قارجىلاندىرۋعا قاتىستى بابىندا «مۇشە مەملەكەتتەر ءوز وكiلدەرi مەن ساراپشىلارىنىڭ ۇيىم ورگاندارىنىڭ كەڭەستەرiنە، وتىرىستارىنا جانە ۇيىم شەڭبەرiندە وتكiزiلەتiن باسقا دا iس-شارالارعا قاتىسۋىمەن بايلانىستى، سونداي-اق وكiلەتتi وكiلدەردىڭ قىزمەتiمەن بايلانىستى شىعىنداردى دەربەس تۇردە اتقارادى» دەگەن تارماق بار. وسى تارماققا سۇيەنەر بولساق، قازاقستانعا اسكەر جىبەرگەن ەلدەر شىعىندى ءوز موينىنا الۋعا مىندەتتى. بىراق الماتى اكىمنىڭ قاۋلىسىنا قاراساق، ۇقشۇ اسكەرىنە كەتكەن شىعىندى قازاقستان ءوزى كوتەرگەن.
