بىرەۋگە قاراپ شۇكىر ەتىپ، بىرەۋگە قاراپ پىكىر ەتۋ ءۇشىن دە وتكەنگە وي، بۇگىنگە كوز جىبەرۋ كەرەك.
شۇكىر، قاڭتارداعى بۇلعاقتان ەس جيىپ ۇلگەرگەندەيمىز. ەل پرەزيدەنتى دەر كەزىندە ولقىلىقتاردىڭ ورنىن وڭالتىپ، قوعام قاجي باستاعان تۇستا وزگەرىسكە دايىن ەكەندىگىن دالەلدەدى. جۇيەمىزدەگى دەرتتى انىقتاپ، ءتۇبى تەرەڭگە كەتكەن ماسەلەلەردىڭ شەشۋ جولدارىن ۇسىنىپ، حالىقتىڭ تالقىسىنا شىعاردى. ساياسي باسەكەنىڭ اشىق جانە ادال بولۋىنا ۋادە ەتتى. «اۋىل ءيتى الا بولسا دا، ءبورى كەلگەندە بىرىگەدى» دەگەن، وسى تۇستا وزگەرىستەن دامەلى جۇرت ادىلدىك ورنايتىنىنا سەنىم ءبىلدىرىپ، رەفەرەندۋمعا كەلدى. جالپى ايتقاندا، الاڭ كۇي كەشىپ وتىرعان قوعام وزگەرىستەردى بايسالدى قابىلداي الدى.
«وسپەس ەلدىڭ بالاسى ونبەس داۋدى داۋلايدى» دەۋشى ەدى عوي. پالەن جىلعى داۋدى ايتىپ داۋرىقپايىن. بىراق ۇتىلعان جەرىمىز تۋرالى ايتۋ – پارىز. ونسىز دا جەتىستىگىمىزدى ەشكىم جەلكەلەپ كەتپەسى انىق. قاسىم-جومارت كەمەلۇلى ناۋرىزداعى جولداۋىندا ساياسي رەفورمالاردىڭ بايىپتى جانە كولەمدى پاكەتىن ۇسىنىپ، مىقتى ازاماتتىق قوعام قۇرۋ قاجەتتىگىن باسا ايتتى. ايتپاسقا دا لاجى بولمادى، سەبەبى ازاماتتىق قوعام ۇستىنى ۋاقىت تەزىنە توتەپ بەرە المادى. مۇنى تۇيسىنەر كەز كەلدى دەپ ويلايمىن. كەشەگى قارالى قاڭتار كۇندەرىندە الداعاننىڭ الدىنا ءتۇسىپ، جەلپىنگەننىڭ جەتەگىندە كەتكەندەر وسىنىڭ دالەلى بولسا كەرەك.... سودان بولار ەلىمىزدە قيت ەتسە بولدى ازاماتتىق قوعامدى جەلەۋلەتىپ، ساياساتتى قوزعايتىندار كوبەيدى. پىكىر قايشىلىعى تۋىنداپ، سىپسىڭ سوزگە سەنگىش بولا باستادىق. تويىمسىزدىق ەسىمىزدى الىپ، ەركىمىزدەن ايىردى. ەل قامىن جەيتىن ەدىگەلەر ەمەس، ءوز قامىن ويلايتىن ەزدەر قاپتادى. شىنىڭدى ايتىپ كەلسەڭ دە، شىمىركپەيتىن شەنەۋنىكتەر پايدا بولدى. ناتيجەسىندە مۇنىڭ بارلىعى دەموكراتياعا ەمەس، ادامداردىڭ كەز كەلگەن ماسەلەدە تىم ساياسيلانىپ كەتۋىنە اكەلىپ سوقتىردى. پيعىلى بۇزىق بولەكتەر ۇرىمتال ءساتتى پايدالانىپ، ەل ىشىندە بۇلىك شىعاردى. بىراق ءبىز توسىن وقيعالاردا بولىنبەيتىن بىرلىگىمىزدى كورسەتتىك. ونعا ءبولىنىپ، ورعا جىعىلعالى تۇرعان قازاق قوعامىن ساقتاپ قالدىق. تاباندا تىنىشتىعىمىزدى بۇزعان كەلىمسەكتەردىڭ قاندى قۇرساۋىنان قۇتىلدىق.
سايىپ كەلگەندە، ەلىمىزدەگى ەڭ ءىرى، الەۋەتتى «AMANAT» ساياسي پارتياسى دا مەملەكەتتىك مۇددەگە ادال ەكەندىكتەرىن اڭعارتتى. قوعامداعى قيانات پەن جەمقورلىقتىڭ جولىن بوگەيتىن كۇش – ادىلدىك جولىن ماقۇل كوردى. جاڭا قازاقستاندا جاڭعىرۋ جولىن تاڭداپ، وزگەرىستەرگە مۇرىندىق بولۋعا نيەت ءبىلدىردى. قازىر دە سول تاڭداۋىنان تايقىماي «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋعا اتسالىسىپ، بارشاعا تەڭ مۇمكىندىك بەرەتىن ازاماتتىق قوعامدى ىلگەرىلەتۋگە كۇش جۇمساپ كەلەدى.
ايتپاعىم، مەملەكەت پەن ازاماتتىق قوعام قاتار دامىپ، ازاماتتار سانالى تۇردە ورتاق ماقساتقا جۇمىلا بىلسە، ەلدىڭ ىرگەسى بەكىپ، تاۋەلسىزدىگى نىعايادى. ال ازاماتتىق قوعامنىڭ قالىپتاسىپ، دامۋى ادامداردىڭ تىكەلەي وزدەرىنە بايلانىستى. سوندىقتان دا ازاماتتىق قوعامعا قولداۋ كورسەتىپ، ونىڭ الەۋەتىن ارتتىرا ءتۇسۋىمىز كەرەك. سوندا عانا ەلىمىزدىڭ قۇقىقتىق تۇرعىدا دامۋىنا ىقپال ەتە الامىز.
ءسوز سوڭىندا ەگەر ءار ادام وزىنە جۇكتەلگەن ءىستى جاۋاپكەرشىلىكپەن كوتەرىپ، ەشكىم ەشكىمنىڭ رىزىعىنا قول سۇقپاي، اماناتقا قيانات جاساماسا، جەمقورلىقتىڭ ءجىبى ءۇزىلىپ، قاراپايىم حالىقتى ەشكىم قۇرعاق سوزبەن الداي دا، ارباي دا الماۋشى ەدى… ارينە، بۇل مەنىڭ ازاماتتىق ۇستانىمىم عانا!
ورالباي مەرگەنبايۇلى،
«ادىرنا» ۇلتتىق پورتالى
