Bireýge qarap shúkir etip, bireýge qarap pikir etý úshin de ótkenge oı, búginge kóz jiberý kerek.
Shúkir, qańtardaǵy bulǵaqtan es jıyp úlgergendeımiz. El Prezıdenti der kezinde olqylyqtardyń ornyn ońaltyp, qoǵam qajı bastaǵan tusta ózgeriske daıyn ekendigin dáleldedi. Júıemizdegi dertti anyqtap, túbi tereńge ketken máselelerdiń sheshý joldaryn usynyp, halyqtyń talqysyna shyǵardy. Saıası básekeniń ashyq jáne adal bolýyna ýáde etti. «Aýyl ıti ala bolsa da, bóri kelgende birigedi» degen, osy tusta ózgeristen dámeli jurt ádildik ornaıtynyna senim bildirip, referendýmǵa keldi. Jalpy aıtqanda, alań kúı keship otyrǵan qoǵam ózgeristerdi baısaldy qabyldaı aldy.
«Óspes eldiń balasy ónbes daýdy daýlaıdy» deýshi edi ǵoı. Pálen jylǵy daýdy aıtyp daýryqpaıyn. Biraq utylǵan jerimiz týraly aıtý – paryz. Onsyz da jetistigimizdi eshkim jelkelep ketpesi anyq. Qasym-Jomart Kemeluly naýryzdaǵy Joldaýynda saıası reformalardyń baıypty jáne kólemdi paketin usynyp, myqty azamattyq qoǵam qurý qajettigin basa aıtty. Aıtpasqa da lajy bolmady, sebebi azamattyq qoǵam ustyny ýaqyt tezine tótep bere almady. Muny túısiner kez keldi dep oılaımyn. Keshegi qaraly qańtar kúnderinde aldaǵannyń aldyna túsip, jelpingenniń jeteginde ketkender osynyń dáleli bolsa kerek.... Sodan bolar elimizde qıt etse boldy azamattyq qoǵamdy jeleýletip, saıasatty qozǵaıtyndar kóbeıdi. Pikir qaıshylyǵy týyndap, sypsyń sózge sengish bola bastadyq. Toıymsyzdyq esimizdi alyp, erkimizden aıyrdy. El qamyn jeıtin Edigeler emes, óz qamyn oılaıtyn ezder qaptady. Shynyńdy aıtyp kelseń de, shimirkpeıtin sheneýnikter paıda boldy. Nátıjesinde munyń barlyǵy demokratııaǵa emes, adamdardyń kez kelgen máselede tym saıasılanyp ketýine ákelip soqtyrdy. Pıǵyly buzyq bólekter urymtal sátti paıdalanyp, el ishinde búlik shyǵardy. Biraq biz tosyn oqıǵalarda bólinbeıtin birligimizdi kórsettik. Onǵa bólinip, orǵa jyǵylǵaly turǵan qazaq qoǵamyn saqtap qaldyq. Tabanda tynyshtyǵymyzdy buzǵan kelimsekterdiń qandy qursaýynan qutyldyq.
Saıyp kelgende, elimizdegi eń iri, áleýetti «AMANAT» saıası partııasy da memlekettik múddege adal ekendikterin ańǵartty. Qoǵamdaǵy qııanat pen jemqorlyqtyń jolyn bógeıtin kúsh – ádildik jolyn maqul kórdi. Jańa Qazaqstanda jańǵyrý jolyn tańdap, ózgeristerge muryndyq bolýǵa nıet bildirdi. Qazir de sol tańdaýynan taıqymaı «Halyq únine qulaq asatyn memleket» tujyrymdamasyn iske asyrýǵa atsalysyp, barshaǵa teń múmkindik beretin azamattyq qoǵamdy ilgeriletýge kúsh jumsap keledi.
Aıtpaǵym, memleket pen azamattyq qoǵam qatar damyp, azamattar sanaly túrde ortaq maqsatqa jumyla bilse, eldiń irgesi bekip, táýelsizdigi nyǵaıady. Al azamattyq qoǵamnyń qalyptasyp, damýy adamdardyń tikeleı ózderine baılanysty. Sondyqtan da azamattyq qoǵamǵa qoldaý kórsetip, onyń áleýetin arttyra túsýimiz kerek. Sonda ǵana elimizdiń quqyqtyq turǵyda damýyna yqpal ete alamyz.
Sóz sońynda eger ár adam ózine júktelgen isti jaýapkershilikpen kóterip, eshkim eshkimniń ryzyǵyna qol suqpaı, amanatqa qııanat jasamasa, jemqorlyqtyń jibi úzilip, qarapaıym halyqty eshkim qurǵaq sózben aldaı da, arbaı da almaýshy edi… Árıne, bul meniń azamattyq ustanymym ǵana!
Oralbaı MERGENBAIULY,
«Adyrna» ulttyq portaly
