شىعىس قازاقستان وبلىسىنداعى دەنساۋلىق ساقتاۋ سالاسىندا JCI ستاندارتى بويىنشا قىزمەت كورسەتۋ وڭ جولعا قويىلدى

212

قر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگ بارىسىندا شىعىس قازاقستان وبلىسىنىڭ اكىمى دانيال احمەتوۆ دەنساۋلىق ساقتاۋ سالاسىنداعى بەس باعىتتى دامىتۋعا باسىمدىق بەرىلەتىنىن اتاپ ءوتتى.

ايماق باسشىسى دەنساۋلىق ساقتاۋ سالاسىن وركەندەتۋ ەڭ باستى مىندەتتەردىڭ ءبىرى ەكەنىن ايتتى. وسى ماقساتتا وبلىستا 3 جىلدىق كەشەندى جوسپار جاسالعان. 2016 جىلدان باستاپ ەمحانالاردى حالىقارالىق ستاندارتتارعا سايكەس جابدىقتاۋ جانە ەمدەۋ بارىسىندا قولدانىلاتىن الدىڭعى قاتارلى تەحنولوگيالاردى ينۆەستيتسيالاۋ، الەمدەگى وزىق ەمحانالار مەن ەلىمىزدەگى جەتەكشى كلينيكالاردا مامانداردى قايتا دايارلاۋدان وتكىزۋ جۇمىستارى جۇرگىزىلۋدە. سونىمەن قاتار تسيفرلاندىرۋ كەزەڭ-كەزەڭىمەن ىسكە اسىرىلۋدا. بۇگىندە وڭىرىمىزدە رەسپۋبليكاداعى جوعارى تەحنولوگيالارمەن جابدىقتالعان عىلىمي ورتالىقتاردىڭ فيليالدارى اشىلۋدا. سونداي-اق وڭىردەگى مەديتسينالىق مەكەمەلەر JCI ستاندارتى بويىنشا قىزمەت كورسەتۋدە.

- وبلىستىق باعدارلامانى ىسكە اسىرۋ ماقساتىندا 22,3 ملرد.تەڭگە ءبولىنىپ، 1080 قۇرال الىندى. بۇل ءتيىستى ناتيجەسىن بەردى. وسىلايشا، جوعارى تەحنولوگيالى مەديتسينالىق تەحنيكا كولەمى 2,5 ەسە ارتىپ، حالىقارالىق اۋديت جۇمىستارىنىڭ 85 پايىزى ورىندالدى. اعىمداعى جىل سوڭىنا دەيىن بۇل كورسەتكىش 100 پايىزدى قۇراماق، - دەدى دانيال احمەتوۆ.

مەديتسينالىق ۇيىمداردى جابدىقتاۋ مەديتسينالىق ورتالىقتاردىڭ قۇرىلىپ، حالىقارالىق ستاندارتتارعا سايكەس جوعارى ساپالى مەديتسينالىق قىزمەت كورسەتۋىنە مۇمكىندىك بەردى. وڭىردە روبوتتى حيرۋرگيا ورتالىعى، كوپجاراقات پەن ورتوپەديا ورتالىقتارى اشىلدى. التاي مەن اياگوز اۋداندارىندا ءىى دەڭگەيدەگى ينسۋلت ورتالىقتارى بوي كوتەردى. سونداي-اق ناۋقاستاردىڭ دياگنوزىن انىقتاۋ ماقساتىندا ونكولوگيا جانە حيرۋرگيا ورتالىعىندا مرت ىسكە قوسىلدى. سەمەيدەگى جەدەل مەديتسينالىق جاردەم اۋرۋحاناسىندا گيبريدتى حيرۋرگيالىق وپەراتسيالار جاساۋ ءۇشىن جاڭادان زال اشىلدى. جەكەمەنشىك سەرىكتەستىك اياسىندا وفتالموحيرۋرگيا ورتالىعى قولدانىسقا بەرىلدى. اتالمىش مەكەمە زاماناۋي قۇرال-جابدىقتارمەن قامتاماسىز ەتىلدى. وندا جوعارى بىلىكتى ماماندار جۇمىس ىستەيدى. سەمەيدە 200 ورىندىق بالالار اۋرۋحاناسىنىڭ قۇرىلىسى اياقتالۋعا جاقىن. بۇدان بولەك وسكەمەندە 300 ادامعا ارنالعان كوپسالالى اۋرۋحانانى سالۋ ماسەلەسى قاراستىرىلۋدا. 2021 جىلى سەمەي يادرولىق مەديتسينالىق ورتالىعىنىڭ قۇرىلىسى اياقتالادى. سونىمەن قاتار ايماقتا ونكولوگيا، كارديولوگيا، بوساندىرۋ جانە بالا، اۋداندىق اۋرۋحانالارداعى باس دارىگەرلەرگە ارنالعان مەنەدجمەنت ءۇش كەزەڭگە ارنالعان باعدارلاما نەگىزىندە وقىتىلۋدا. وقۋدىڭ ءبىرىنشى كەزەڭىندە 3,7 مىڭ دارىگەر سەمەيدەگى مەديتسينا  ۋنيۆەرسيتەتى مەن رەسپۋبليكالىق عىلىمي زەرتتەۋ ينستيتۋتىندا ءبىلىم الدى. ەكىنشى كەزەڭدە 1,5 مىڭ دارىگەر 86 شەبەرلىك سىنىبىنا قاتىستى. وعان قازاقستاندىق جانە الەمدىك دەڭگەيدەگى بىلىكتى ماماندار تارتىلدى. ءدارىس وبلىستاعى ەمحانالاردىڭ بازاسىندا ءوتتى. ءۇشىنشى كەزەڭدە 276 مامان ۇلىبريتانيا، گەرمانيا، جاپونيا، يتاليا، پولشا، ليتۆا مەن يزرايل ەلدەرىنە بارىپ، بىلىكتىلىكتەرىن ارتتىرىپ قايتتى. ال 2020 جىلى 300 مەديتسينا قىزمەتكەرىن شەتەلگە جىبەرىپ وقىتۋ جوسپارلانۋدا. قازىرگى كۇنى مەديتسينالىق مەكەمەلەر "التىن ستاندارت" JCI  حالىقارالىق ستاندارتى بويىنشا اككرەديتاتسيادان وتۋدە. ازىرشە بۇل جۇمىستار سەمەيدەگى جەدەل جاردەم اۋرۋحاناسىنىڭ بازاسىندا جۇرگىزىلۋدە. 2021 جىلعا دەيىن ءدال وسىنداي مەديتسينالىق قىزمەت كورسەتۋ ستاندارتى وسكەمەندەگى انا مەن بالا ورتالىعىنا كەلۋشىلەرگە دە كورسەتىلمەك.

- ايتا كەتەيىك، 3 جىلدىق كەشەندى جوسپار قۇرۋدىڭ ناتيجەسىندە ءسابي ءولىمى 22%، ەندى عانا پايدا بولعان قاتەرلى ىسىك كورسەتكىشى 4,5%  ازايدى. ونىڭ الدىن الۋ ءۇشىن دياگنوستيكالاۋ مەن ەمدەۋدىڭ 130 مىڭنان استام جاڭا ءتۇرى ەنگىزىلدى. سوندىقتان تۇرعىندار مەديتسينالىق قىزمەت كورسەتۋ ساپاسىنىڭ دامۋىنا 134% بەرىپ، كوڭىلدەرى تولعانىن كورسەتىپ وتىر. ال قاتەرلى ىسىكتى ەرتە باستان انىقتاۋ جۇمىسى 106% قۇرادى، - دەپ قورتىندىلادى دانيال احمەتوۆ

«ادىرنا» ۇلتتىق پورتالى

پىكىرلەر