ماسكەۋ ۇلىبريتانيانىڭ ءبىر توپ مەديا قىزمەتكەرى مەن اسكەري سالا وكىلدەرىنىڭ رەسەي اۋماعىنا كەلۋىنە تىيىم سالدى. رەسەي سىرتقى ىستەر مينيسترلىگى 14 ماۋسىمدا جاريالاعان "قارا تىزىمگە" 49 ادام ەنگىزىلگەن، دەپ حابارلايدى "ادىرنا" ۇلتتىق پورتالى "ازاتتىققا" سىلتەمە جاساپ.
رەسەي ءسىم تاراتقان مالىمدەمەدە بۇل شەشىم وسىعان دەيىن رەسەيلىك "جەتەكشى جۋرناليستەر" مەن رەسەي قورعانىس مينيسترلىگىنە قاراستى كومپانيالار باسشىلارىنا لوندوننىڭ سالعان سانكتسيالارىنا جاۋاپ رەتىندە قابىلدانعانى ايتىلعان.
رەسەي بيلىگى ەل اۋماعىنا كەلۋگە تىيىم سالعانداردىڭ اراسىندا ۆۆس، Guardian, Times, Sunday Times, Financial Times, Daily Telegraph, Sky News, Independent جانە باسقا بريتاندىق مەديا كومپانيالاردا جۇمىس ىستەيتىن جۋرناليستەر مەنەدجەرلەر بار. ماسكەۋ ولاردى "رەسەي جايلى جانە ۋكراينا مەن دونباسستاعى جاعداي تۋرالى بىرجاقتى ءارى جالعان اقپاراتتى قاساقانا تاراتىپ", بريتان قوعامىندا "رۋسوفوبيانى قوزدىرىپ وتىر" دەپ ايىپتاعان.
بۇعان قوسا رەسەي ۇلىبريتانيانىڭ قورعانىس سالاسىنا قاتىسى بار 20 ادامعا سانكتسيا سالعان. ولار ۋكرايناعا قارۋ-جاراق بەرۋ تۋرالى شەشىم قابىلداۋعا قاتىسقان دەيدى ماسكەۋ.
مامىردىڭ باسىندا لوندون رەسەيلىك ونداعان جەكە جانە زاڭدى تۇلعاعا، سونىڭ ىشىندە بىرقاتار باق پەن بىرنەشە جۋرناليسكە سانكتسيا سالعان. ولاردىڭ اراسىندا ۆگترك مەملەكەتتىك مەديا كومپانياسى مەن رەسەيلىك باسىلىمداردىڭ اسكەري تىلشىلەرى سانكتسياعا ىلىنگەن.
بۇعان قوسا ۇلىبريتانيا بيلىگى سوعان دەيىن تىيىم سالىنعان رەسەيلىك RT and Sputnik مەدياسىنىڭ ينتەرنەتتەگى سايتتارىن، الەۋمەتتىك جەلىلەردەگى اككاۋنتتارى مەن ينتەرنەت-دۇكەندەگى قوسىمشالارىن بۇعاتتاعان ەدى.
"ادىرنا" ۇلتتىق پورتالى
