«سق-فارماتسيانىڭ» بۇرىنعى باسشىسى بەرىك ءشارىپتى كىناسىز دەپ تانىعان نۇر-سۇلتان قالاسى ەسىل اۋداندىق سوتىنىڭ سۋدياسى قانات دۇيسەمبيەۆ قىزمەتىنەن كەتتى، دەپ حابارلايدى «ادىرنا» ءتىلشىسى.
ول ءوز سوزىندە قابىلدانعان شەشىمدەرمەن كەلىسپەيتىندىگىن ايتىپ، سوت جۇيەسىندە ءتۇرلى شيكىلىكتىڭ بار ەكەندىگىن مالىمدەدى.
«راسىندا دا، ءومىرىمنىڭ 25 جىلىن زاڭ سالاسىنا ارناي وتىرىپ، كاسىبي تۇرعىدان جارامسىز بولىپ قالدىم. سۋديانىڭ تاۋەلسىزدىگى ادىلدىگىنەن، ءىستىڭ ءمان-جايىن زەرتتەپ، ونىڭ قۇقىقتىق ساناسى مەن بوستاندىعىنا ەشبىر اسەر ەتپەي سوت اكتىسىن شىعارۋ قابىلەتىنەن كورىنەدى دەپ ويلايتىنمىن. شىن مانىندە قالاي؟ قازاقستاندا سوت شەشىمدەرىن قابىلداۋ كەزىندە سۋديالاردىڭ سوت توراعالارىنا نەمەسە جوعارى تۇرعان ورگاندارعا باعىنۋى ماعىناسىندا سوت بيلىگىنىڭ يەرارحيالىق ۇيىمى جۇمىس ىستەيدى. ياعني، مامان سوت اكتىسىن شىعارار الدىندا ءىس بويىنشا «انىقتاما» جاساپ، ءوزىنىڭ توراعاسىمەن نەمەسە جوعارى تۇرعان ورگانمەن كەلىسۋى ءتيىس. وسى ىشكى، كورپوراتيۆتىك «ەرەجەلەردى» ساقتاماۋ بولاشاقتا سۋديا ءۇشىن قۋدالاۋ جانە جۇمىستان شىعارۋ تۇرىندە جاعىمسىز سالدارعا اكەلۋى مۇمكىن»،– دەپ جازدى بۇرىنعى سۋديا.
