«SQ-Farmaııanyń» burynǵy basshysy Berik Sháripti kinásiz dep tanyǵan Nur-Sultan qalasy Esil aýdandyq sotynyń sýdıasy Qanat Dúısembıev qyzmetinen ketti, dep habarlaıdy «Adyrna» tilshisi.
Ol óz sózinde qabyldanǵan sheshimdermen kelispeıtindigin aıtyp, sot júıesinde túrli shıkiliktiń bar ekendigin málimdedi.
«Rasynda da, ómirimniń 25 jylyn zań salasyna arnaı otyryp, kásibı turǵydan jaramsyz bolyp qaldym. Sýdıanyń táýelsizdigi ádildiginen, istiń mán-jaıyn zerttep, onyń quqyqtyq sanasy men bostandyǵyna eshbir áser etpeı sot aktisin shyǵarý qabiletinen kórinedi dep oılaıtynmyn. Shyn máninde qalaı? Qazaqstanda sot sheshimderin qabyldaý kezinde sýdıalardyń sot tóraǵalaryna nemese joǵary turǵan organdarǵa baǵynýy maǵynasynda sot bıliginiń ıerarhııalyq uıymy jumys isteıdi. Iaǵnı, maman sot aktisin shyǵarar aldynda is boıynsha «anyqtama» jasap, óziniń tóraǵasymen nemese joǵary turǵan organmen kelisýi tıis. Osy ishki, korporatıvtik «erejelerdi» saqtamaý bolashaqta sýdıa úshin qýdalaý jáne jumystan shyǵarý túrinde jaǵymsyz saldarǵa ákelýi múmkin»,– dep jazdy burynǵy sýdıa.
