وزبەكستاندا بازارلار مەن دۇكەندەردە قانت ءۇشىن بۇرىن-سوڭدى بولماعان دۇربەلەڭ بايقالدى، دەپ حابارلايدى "ادىرنا" ۇلتتىق پورتالى "Tengrinews.kz"-كە سىلتەمە جاساپ.
جاقىندا الەۋمەتتىك جەلىلەردە وزبەكستان سۋپەرماركەتتەرىنىڭ بىرىندە ساتىپ الۋشىلار اراسىنداعى دۇربەلەڭ كورىنەتىن بەينەروليك تارادى. وعان ەرلەر دە، ايەلدەر دە قاتىسقان.
جەلى قولدانۋشىلارى تاشكەنت بازارلارىندا قانت ءۇشىن كەزەك بولىپ جاتقانىن جازىپ جاتىر. سونىڭ ىشىندە بۇل جاعداي "كۋيليۋك" بازارىندا بايقالادى.
"ادامدار، ايتىڭىزدارشى، نەگە مۇنداي جاعدايعا جەتۋ كەرەك؟ بۇل - جاي عانا جۇيكە جۇيەسىن ءولتىرۋ. سۋرەتتە 10 مىڭ سۋم تۇراتىن قانت ءۇشىن كەزەك. بۇل ەلدەگى سوڭعى قانت سياقتى. بايعۇس ميليتسيا كونتسەرتتە جۇرگەندەي تۇر", - دەپ جازدى وزبەك استاناسىنىڭ تۇرعىنى فەيسبۋك جەلىسىندە.
جەرگىلىكتى تۇرعىنداردىڭ ايتۋىنشا، مۇنداي جاعداي بىرنەشە كۇن بويى يۋنۋساباد دەحكان بازارىندا جانە باسقا بازارلاردا دا بولىپ جاتىر. ال بيلىك وكىلدەرى ەلدە قانتتىڭ جەتكىلىكتى قورى بارىن، تاپشىلىق بولمايتىنىن ايتقان.
"ادىرنا" ۇلتتىق پورتالى
