شىمكەنتتىڭ ەكس-اكىمى عابيدوللا ءابدىراحىموۆ وزىنە قاتىستى قىلمىستىق ءىس قوزعالدى دەگەن اقپاراتقا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
"orda.kz"-ءتىڭ جازۋىنشا، شىمكەنتتىڭ بۇرىنعى اكىمىنىڭ ايتۋىنشا، وعان قۇقىق قورعاۋ ورگاندارىنان ەشقانداي حابارلاما كەلمەگەن.
– شىنىمدى ايتسام، ەشقانداي ءىس تۋرالى حابارىم جوق. ەشكىم ەشقايدا شاقىرعان جوق، ماعان ەسكەرتپەدى. الەۋمەتتىك جەلىدە جازىلعاندار بوس ءسوز. بۇعان مەنىڭ ەش قاتىسىم جوق. بۇل نە ءۇشىن جاسالعانىن بىلمەيمىن. ول ادام (ارىز جازعان – اۆت.) – قاراپايىم كاسىپكەر، قازاقستاندا وندايلار كوپ. مەن كوپ كاسىپكەردى بىلەمىن. بىراق ول اداممەن ەشقانداي قاتىسىم بولعان ەمەس. ونىمەن مۇلدەم بايلانىستا بولعان جوقپىن. ارينە، ءومىر بويى، دالىرەك ايتساق، 22 جىل مەملەكەتتىك قىزمەتتە بولدىم. مەن دە باسقالار سياقتى بۇل بيزنەسمەندەردى مەملەكەتتىك قىزمەتكەر رەتىندە عانا ءبىلۋىم مۇمكىن، – دەدى ءابدىراحىموۆ.
سونداي-اق، ول اۋىر قىلمىس جاسادى دەپ ايىپتاۋ ء"وز الدىنا قىلمىس ەكەنىن" اتاپ ءوتتى.
– نەگە ادامدار مۇندايعا جول بەرەدى. بۇل اقپاراتتى جاريالاعان كوزاچكوۆ مىرزا ماعان حابارلاسپادى. كەشە باس پروكۋراتۋرا دا اقپاراتتى تەرىسكە شىعاردى. بىراق ولار ءالى تىنىشتالماي وتىر. ماعان بىرەۋ "تاپسىرىس" بەرگەن سياقتى. بىراق مۇنىڭ نە ءۇشىن جاسالىپ جاتقانىن بىلمەيمىن، – دەپ قوستى ەكس-اكىم.
ءابدىراحىموۆ قازىر نۇر-سۇلتاندا تۇراتىنىن، كاسىپكەرلىكپەن جانە جوبالارمەن اينالىسىپ جاتقانىن ايتتى.
ايتا كەتۋ كەرەك، كەشە پوليتسيا شىمكەنتتىڭ ەكس-اكىمى عابيدوللا ءابدىراحىموۆ پەن قر ۇقك بۇرىنعى توراعاسى كارىم ماسىموۆكە قاتىستى قىلمىستىق ءىستىڭ قوزعالعانىن راستاعان بولاتىن. حابارلامادا قىلمىستىق دەرەك بويىنشا ءىس جۇرگىزۋدى الماتى قالاسى پد تەرگەۋ باسقارماسى جۇزەگە اسىراتىنى ايتىلعان.
"ادىرنا" ۇلتتىق پورتالى
