قازاقستان حالىق پارتياسىنىڭ توراعاسى ەرمۇحامەت ەرتىسباەۆ قازاقستان رەسپۋبليكاسى كونستيتۋتسياسىنا ەنگىزىلگەن تۇزەتۋلەر بويىنشا رەسپۋبليكالىق رەفەرەندۋمنىڭ قورىتىندىسىنا قاتىستى رەسمي مالىمدەمە جاسادى، دەپ حابارلايدى “ادىرنا” ۇلتتىق پورتالى.
5 ماۋسىم كۇنى رەفەرەندۋمدا ازاماتتار داۋىس بەرگەن كونستيتۋتسياداعى وزگەرىستەر كۇشىنە ەندى. كونستيتۋتسياعا وزگەرىستەر مەن تولىقتىرۋلار ەنگىزۋ تۋرالى زاڭ «ەگەمەن قازاقستان» گازەتىندە جاريالانعان.
وزگەرىستەرگە سايكەس:
- قازاقستان سۋپەر-پرەزيدەنتتىك باسقارۋ فورماسىنان كۇشتى پارلامەنتى بار پرەزيدەنتتىك فورماعا كوشەدى. جەر جانە ونىڭ قويناۋى، سۋ كوزدەرى، وسىمدىكتەر مەن جانۋارلار دۇنيەسى، باسقا دا تابيعي رەسۋرستار حالىققا تيەسىلى.
- پرەزيدەنتتىڭ جاقىن تۋىستارىنىڭ ساياسي مەملەكەتتىك قىزمەتشى، كۆازيمەملەكەتتىك سەكتور سۋبەكتىسى باسشىلارى لاۋازىمدارىن اتقارۋعا قۇقىعى جوق. قازاقستاندىقتار ءوز بەتىنشە كونستيتۋتسيالىق سوتقا جۇگىنە الادى.
- ءولىم جازاسىنا تىيىم سالىنادى. ەشكىمنىڭ ادام ءومىرىن قيۋعا قۇقىعى جوق. ءماجىلىستىڭ دەپۋتاتتىق كورپۋسى ارالاس سايلاۋ جۇيەسى بويىنشا قۇرىلادى.
- سەناتتاعى پرەزيدەنتتىك كۆوتا قىسقارىپ، ماجىلىستەگى قحا كۆوتاسى جويىلادى. ماجوريتارلىق جۇيە دەپۋتاتتى سايلاۋشىلاردىڭ قالاۋى بويىنشا شاقىرتىپ الۋعا مۇمكىندىك بەرەدى.
“حالىق پارتياسى بىردەن قوعامداعى يدەيالىق كۇرەسكە قوسىلىپ، رەفەرەندۋمدى قولداۋ ءۇشىن اۋقىمدى ۇگىت-ناسيحات جۇمىسىن جۇرگىزدى. ءبىز ناتيجەگە ريزامىز جانە بۇل – بارلىق قازاقستاندىقتىڭ جەڭىسى دەپ سانايمىز. قازاقستاندىقتار ءىس جۇزىندە پرەزيدەنت قاسىم-جومارت توقاەۆقا زور سەنىم ءبىلدىردى. جاڭا، ادىلەتتى قازاقستاننىڭ بەرىك كونستيتۋتسيالىق ىرگەتاسى قالاندى دەپ ايتۋعا بولادى”، – دەدى پارتيا توراعاسى ءسوز باسىندا.
”ادىرنا” ۇلتتىق پورتالى
