اقمولا وبلىسىندا ءىز-ءتۇسسىز جوعالعان ايەل ىزدەستىرىلۋدە، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
30 مامىردا كوكشەتاۋ قالاسىنىڭ پوليتسيا باسقارماسىنا كراسنىي يار كەنتىنىڭ تۇرعىنىنان 25 مامىردا تاڭعى ساعات 08:30 شاماسىندا ۇيدەن شىعىپ، پوليتسياعا جۇگىنگەنگە دەيىن ورنالاسقان ورنى بەلگىسىز 42 جاستاعى تۋعان اپكەسىن ىزدەۋگە كومەك كورسەتۋ تۋرالى ءوتىنىش كەلىپ ءتۇستى. ازاماتشا اپكەسىنىڭ كوكشەتاۋ قالاسىنا جۇمىسقا ورنالاسۋ ماقساتىندا كەتىپ، جوعالعانىن جانە اپكەسىنىڭ ۇيالى تەلەفونى جوق ەكەنىن ءتۇسىندىردى.
ءوتىنىش بەرۋشى اپكەسىنىڭ ۇستىندە قارا ءتۇستى جەمپىر مەن شالبار، اياعىندا كروسسوۆكا بولعانىن حابارلادى. حابار-وشارسىز جوعالعان ادامنىڭ ورنالاسقان ورنىن انىقتاۋ ءۇشىن پوليتسيا دەپارتامەنتى مەن كوكشەتاۋ قالاسى باسقارماسىنىڭ جەكە قۇرامى باعدارلاندى، ايەلدىڭ بولۋى مۇمكىن تەرريتوريالار مەن باعىتتار، ءۋاليحانوۆ، بولاشاق، كراسنويارسكايا، تسەليننايا، شكولنايا جانە تاعى باسقا دا كوشەلەر تەكسەرىلدى.
جوعالعان ايەلدىڭ تانىستارىنىڭ شەڭبەرى، سونداي-اق بەينەباقىلاۋ كامەرالارىنىڭ جازبالارى زەرتتەلدى. ىزدەۋ شارالارىنا ەرىكتىلەر قوسىلدى.
بۇگىنگى كۇنى جان-جاقتى جەدەل-ىزدەستىرۋ ءىس-شارالارى جالعاسۋدا. اقمولالىق پوليتسەيلەر حابار-وشارسىز جوعالعان ادامنىڭ ورنالاسقان ورنى تۋرالى قانداي دا ءبىر اقپاراتقا يە بولعانداردىڭ بارلىعىنان كوكشەتاۋ قالاسىنىڭ پوليتسيا باسقارماسىنا 29-96-00 تەلەفونى نەمەسە 102 ارنايى تەلەفونى ارقىلى حابارلاۋدى سۇرايدى.
