17 جاستاعى الان جاينار الەمدىك جوعارى وقۋ ورىندارىندا 640 مىڭ دوللارعا گرانت جەڭىپ الدى، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
الان الماتىدا تۋىپ وسكەن. وسى جىلى رەسپۋبليكالىق فيزيكا-ماتەماتيكا مەكتەبىندە وقۋىن اياقتايدى. ونىڭ سۇيىكتى پاندەرى - فيزيكا، ماتەماتيكا جانە ينفورماتيكا. كەيىنگى جىلدارى ول بىرنەشە رەت حالىقارالىق كونكۋرستار مەن وليمپيادالارعا قاتىسقان.
"11-سىنىپتا كوماندامەن بىرگە ەكىنشى ورىن الدىق. تاقىرىبى - كومپيۋتەرلىك عىلىم. ءبىز مۇقتاج ادامدارعا كومەكتەسۋگە دايىن ادامدار ءۇشىن بايلانىس قوسىمشاسىن جاسادىق. حالىقارالىق بايقاۋ يندونەزيادا ءوتتى، وعان 30-دان اسا ەل قاتىستى", - دەدى ول.
جاينار IAACompetition استرونوميا جانە استروفيزيكا بويىنشا حالىقارالىق وليمپيادادا ءبىرىنشى ورىنعا يە بولدى.
بۇگىنگى تاڭدا 17 جاستاعى قازاقستاندىق وقۋشى الەمنىڭ 11 ۋنيۆەرسيتەتىنە وقۋعا ءتۇسىپ، 640 مىڭ دوللار كولەمىندە گرانت الدى. ونىڭ ايتۋىنشا، مىنا الەمدىك جوعارى وقۋ ورىندارىنا شاقىرتۋ الدى:
- University of British Columbia (ۆانكۋۆەر، كانادا);
- KAIST (وڭتۇستىك كورەيا);
- City University of Hong Kong (گونكونگ);
- Hong Kong Baptist University (گونكونگ);
- University of South Florida (تامپا، اقش);
- University of Alabama (اقش);
- Hong Kong University (گونكونگ);
- Saint Louis University in Madrid (يسپانيا);
- The Hong Kong Polytechnic University (گونكونگ);
- Hong Kong University of Science and Technology (گونكونگ);
- Miami University (وگايو، اقش).
"مەن وڭتۇستىك كورەياداعى KAIST ۋنيۆەرسيتەتىن تاڭدادىم. وندا وقۋ تەگىن، گرانت جانە ستيپەنديا بەرىلەدى. ۋنيۆەرسيتەت وتە جاقسى، ول الەمدە 41-ورىندا. ماعان ەلدىڭ ءوزى ۇنايدى، ول جاق قاۋىپسىز. تاڭداعان ماماندىعىم بويىنشا - كومپيۋتەرلىك عىلىم - KAIST 35-ورىندا", - دەپ ءتۇسىندىردى ول.
الان كەيىن قازاقستانعا ورالۋدى جوسپارلاپ وتىر.
"مەن ءوز ەلىمە كومەكتەسكىم كەلەدى. تەحنولوگيانىڭ كوبىرەك دامىعانىن قالايمىن. ماعان وڭتۇستىك كورەيا ۇنايدى، بۇل ەلدە تابيعي رەسۋرستار كوپ ەمەس، بىراق تەحنولوگيالار وتە جاقسى دامىعان، تاجىريبە العىم كەلەدى. ءومىردىڭ ءمانى - ءوز ءىزىڭدى قالدىرۋ، بۇل اقشا ەمەس", - دەدى ول.
“ادىرنا” ۇلتتىق پورتالى
