ەلوردادا جىل باسىنان بەرى 87 بالا ءىس-ءتۇسسىز جوعالىپ كەتكەن. بۇل وتكەن جىلمەن سالىستىرعاندا ەكى ەسەگە كوپ، دەپ حابارلايدى "ادىرنا" ۇلتتىق پورتالى.
"اstanatv." ارناسىنىڭ مالىمەتىنشە، بالا جوعالۋ وقيعاسىنا ادامي فاكتور اسەر ەتۋى مۇمكىن. مۇنداي بولجامدى ساراپشىلار العا تارتىپ وتىر. ال پوليتسيا قىزمەتكەرلەرى ۇيدە ورىن الىپ جاتقان تۇيتكىلدەر دە جەتكىنشەكتىڭ وزگە ادامنىڭ جەتەگىنە تەز ەرىپ كەتۋىنە اسەر ەتەتىنىن ايتادى.
ماسەلەن، 16 جاستاعى جامال بەكەتوۆا 10 كۇننەن بەرى ىزدەستىرىلىپ جاتىر. اۋلاعا دوپ وينايمىن دەپ كەتكەن جەتكىنشەك ۇيىنە ورالماعان. ۇشتى-كۇيلى جوق. كوردىم، ءبىلدىم دەگەندەر دە تابىلار ەمەس.
"جامالدىڭ جوعالعانى تۋرالى بىزگە 17 مامىر كۇنى مالىمەت كەلىپ ءتۇستى. ءبىز سول ساتتەن باستاپ بارلىق اقپاراتتاردى جيناپ، ىزدەستىرۋ جۇمىسىن باستادىق. بالالار بارۋى مۇمكىن دەگەن جەردىڭ بارلىعىن قاراپ شىقتىق. بىراق، 10 كۇن ءوتتى. ءالى تابىلمادى. قازىر بۇكىل قازاقستان بويىنشا ءبىزدىڭ ءار وڭىردەگى ەرىكتىلەر جەتكىنشەكتى ىزدەپ جاتىر", - دەدى ۆولونتەر دامير ءسالىموۆ.
ءداميردىڭ ايتۋىنشا، ەرىكتىلەر ورتالىعىنا كۇنىنە 2-3 بالانىڭ جوعالعانى تۋرالى مالىمەت كەلىپ تۇسەدى. ىشكى ىستەر ورگاندارىنىڭ قىزمەتكەرلەرى دە مۇنداي جاعدايدىڭ جيىلەپ تۇرعانىن راستايدى.بيىل بالالاردىڭ جوعالۋ دەرەگى وتكەن جىلمەن سالىستىرعاندا 2 ەسە وسكەن. بىراق، كوپ جاعدايدا ولار تابىلادى دەيدى.
"اتا-انالار مىسالى اۋلادا ويناپ جۇرگەن كەزدە 5-6 جاستاعى بالاسىن تاپپاي قالعان جاعدايدا 102 نومەرىنە حابارلاسادى. بىراق ارتىنشا ول بالالار تابىلىپ جاتادى. كەلەسى اۋلاعا ويناپ كەتۋى مۇمكىن. ول بالالار كەيىن بىردەن تابىلادى", - دەيدى نۇر-سۇلتان قالاسى ەسىل اۋدانى پوليتسيا باسقارماسىنىڭ يۋۆەنالدىق پوليتسيا اعا ينسپەكتورى ۇلبوسىن مۇسابەكوۆا.
قۇقىق قورعاۋ قىزمەتكەرلەرىنىڭ مالىمەتىنە سۇيەنسەك، بىلتىر جانە بيىل جوعالعان 144 بالانىڭ بارلىعى وتباسىنا امان-ەسەن ورالعان.
"ادىرنا" ۇلتتىق پورتالى.
