كوممۋنيست-دەپۋتاتتار پۋتينگە ءسوز سويلەپ، ودان ارنايى وپەراتسيانى توقتاتىپ، ۋكراينادان اسكەردى شىعارۋدى سۇرادى. پريمورسك ولكەسىنىڭ گۋبەرناتورى ولەگ كوجەمياكو دەپۋتاتتاردىڭ ارەكەتى "رەسەي ارمياسىنىڭ بەدەلىن تۇسىرەدى" دەپ مالىمدەدى، دەپ حابارلايدى "ادىرنا" ۇلتتىق پورتالى.
"VL.ru" پورتالىنىڭ جازۋىنشا، رەسەي فەدەراتسياسىنىڭ كوممۋنيستىك پارتياسىنان سايلانعان پريمورسك ولكەسىنىڭ زاڭ شىعارۋشى اسسامبلەياسىنىڭ دەپۋتاتتارى رەسەي پرەزيدەنتى ۆلاديمير پۋتينگە ۇندەۋ جاريالاپ، وندا ۋكرايناداعى اسكەري وپەراتسيانى توقتاتۋعا شاقىردى.
رف كوممۋنيستىك پارتياسىنىڭ دەپۋتاتى لەونيد ۆاسيۋكەۆيچ مالىمدەمە جاسادى. بىرىنشىدەن، ول بۇل ۇندەۋ وسىدان بىرنەشە كۇن بۇرىن پارلامەنت ءماجىلىسىنىڭ وتىرىسىندا قازا تاپقان اسكەريلەردىڭ وتباسىلارىنا قولداۋ كورسەتۋ شارالارى كەشەنى قابىلدانعاننان كەيىن جاسالعانىن ءتۇسىندىردى.
"ەگەر ەلىمىز اسكەري وپەراتسيانى توقتاتپاسا، جەتىمدەر سانى بۇدان دا كوپ بولاتىنىن تۇسىنەمىز. اسكەري وپەراتسيا كەزىندە ادامدار مۇگەدەك بولىپ قالۋدا، ولاردىڭ اراسىندا ەلىمىزگە ۇلكەن پايدا اكەلەتىن جاستار دا بار. ءبىز رەسەي فەدەراتسياسىنىڭ اسكەرلەرىنىڭ تەز ارادا شىعارىلۋىن تالاپ ەتەمىز", - دەدى ۆاسيۋكەۆيچ. ءسوزىنىڭ سوڭىندا ول ۇندەۋدى دەپۋتاتتار ناتاليا كوچۋگوۆا، الەكساندر سۋستوۆ جانە گەننادي شۋلگا قولداعانىن ايتتى.
ۆاسيۋكەۆيچكە پريمورسك ولكەسىنىڭ گۋبەرناتورى ولەگ كوجەمياكو ونىڭ ارەكەتى "ورىس اسكەرىنىڭ ابىرويىن تۇسىرەدى" دەپ، كەيىن ونى ءماجىلىس زالىنان شىعارىپ، ء"سوزىن قايتىپ الۋدى" تالاپ ەتتى.
ايماقتاعى "ادىلەتتى رەسەي" فراكتسياسىنىڭ جەتەكشىسى الەكسەي كوزيتسكي مەن زاڭ شىعارۋشى اسسامبلەيا توراعاسى الەكساندر روليك كوجەمياكونىڭ ۇسىنىسىن قولدادى. داۋىس بەرۋ ناتيجەسىندە (27 دەپۋتات جاقتادى، بەسەۋى – قارسى) ۆاسيۋكەۆيچ پەن شۋلگا ءبىر وتىرىستا ءسوز سويلەۋ قۇقىعىنان ايىرىلدى.
جيىن سوڭىندا پريمورەنىڭ زاڭ شىعارۋ جينالىسىنداعى رف كوممۋنيستىك پارتياسىنىڭ جەتەكشىسى اناتولي دولگاچەۆ ارىپتەستەرىنىڭ ۇندەۋىنە فراكتسيا كەلىسپەيتىنىن ايتىپ، ولاردىڭ ارەكەتىن ء"ابسوليۋتتى دەمارش" دەپ اتادى.
"ادىرنا" ۇلتتىق پورتالى.
