قر مادەنيەت جانە سپورت ءمينيسترى داۋرەن اباەۆ كوك تۋدى ساحناعا الىپ شىعىپ، بالاعات سوزدەر ايتقان "يرينا كايراتوۆنا" توبىنىڭ مۇشەسى مەن كوپشىلىك Shiza دەپ تانيتىن اسحات جولشيەۆكە قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
مينيستر ينستاگرامداعى پاراقشاسىندا بىلاي دەپ جازدى:
"مەنى Instagram-دا بەلگىلەپ، ءبىراز حابارلاما جىبەرىپسىزدەر. كوپشىلىك تالقىلاپ جاتقان كونتسەرتتى ۇيىمداستىرۋعا مادەنيەت جانە سپورت مينيسترلىگىنىڭ قاتىسى بولماسا دا، جاۋاپ بەرە كەتكەنىمىز دۇرىس.
مادەنيەت جانە سپورت ءمينيسترى ءارى قازاقستان ازاماتى رەتىندە مەن ساحنا تورىندە كەلەڭسىز جاعدايدىڭ ورىن الۋىنا مۇلدەم قارسىمىن.
ساحنا – كيەلى ورىن. ساحنا مادەنيەتىن ساقتاماعانداردى، بەيادەت سويلەگەندەردى، ولاردىڭ ءبارىن بىلاي قويعاندا ەلدىگىمىزدىڭ نىشانى سانالاتىن قاستەرلى اتريبۋتتارىمىزعا قۇرمەتسىزدىك تانىتقانداردى ەشقانداي اقتاپ الۋعا كەلمەيدى.
جاعدايعا قاتىسى بار ازاماتتار ءوز قاتەلىگىن ەسكەرىپ، ساباق الادى دەپ ويلايمىن. دەگەنمەن كونتسەرت ۇيىمداستىرۋشىلارى مىندەتتى تۇردە جاۋاپقا تارتىلۋى كەرەك. حالىقتىڭ اشۋى ورىندى. كوك تۋىمىزدان ەشقايسىمىز بيىك ەمەسپىز", — دەپ جازدى ول.
ايتا كەتۋ كەرەك، قازىر جەلىدە بۇل جاعىمسىز جايتقا بايلانىستى حالىق نارازىلىق ءبىلدىرىپ جاتىر.
"ادىرنا" ۇلتتىق پورتالى.
