Keshe, 26 mamyrda Prezıdent janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń jańa quramdaǵy alǵashqy otyrysy ótti. Bul týraly Aıda Balaeva Facebook paraqshasyna jarııalady, dep habarlaıdy “Adyrna” ulttyq portaly.
“Árıne, Komıssııa burynǵy quramda da nátıjeli eńbek etip, kóptegen baıandy bastamalardy kótergeni belgili. Onyń barlyǵy qoǵamnan da, halyqaralyq deńgeıde de óz baǵasyn aldy. Osy qarqynnan qalmaı aldaǵy ýaqytta da negizgi mindetterdi iske asyrýdyń tetikterin kúsheıte beretin bolamyz.
Jańa qurammen alǵashqy jıynnyń referendým qarsańynda ótýiniń máni zor. Konstıtýııalyq reforma – azamattyq qoǵamdy damytýǵa tyń serpin beretin jańa múmkindik ekeni belgili. Sondyqtan ádiletti ári qaýipsiz qoǵam qurý jolynda elimizdegi eń úlken áıelder qozǵalysyna aınalyp úlgergen Ulttyq komıssııaǵa da úlken jaýapkershilik artylyp otyr. Jańa Qazaqstan qurýdyń basty qaǵıdalaryna saı Ulttyq Komıssııanyń jumysy ashyq ári halyqqa túsinikti bolýy tıis”, - dedi ol.
Sondaı-aq, Aıda Balaeva otbasy máselesine de toqtalý keregin basa aıtyp ótti.
“Aldymen otbasynyń máselesin sheshpeı turyp, tutas qoǵamnyń damýy týraly sóz aıtý artyq ekeni túsinikti. Ókinishke oraı, bul baǵytta másele joq emes. Mysaly, sońǵy 5 jyl ishinde otbasylyq-turmystyq janjal boıynsha qylmystyq quqyq buzýshylyq 2 esege ósken. Kámeletke tolmaǵandarǵa qatysty jynystyq zorlyq kórsetý qylmysy da jıi oryn alýda. Árbir úshinshi neke buzylyp, ajyrasqandardyń úlesi jyldan jylǵa artýda. Kámelet jasqa tolmaǵan balalary bar jalǵyzbasty analardyń da qatary kóbeıýde...
Sondyqtan Komıssııa jumysyna qatysty birqatar ózgerister qabyldadyq:
Birinshi, jumys júrgizý barysyn naqtyladyq.
Ekinshi, jańa ýaqyttyń syn-qaterleri men olardy sheshýge qatysty tereń taldaýlar jasalatyn bolady.
Úshinshi, óńirlerdegi ahýal erekshe nazarǵa alynady.
Tórtinshi, Komıssııa jumysynda ǵylymı-taldaý baǵytyn damytamyz.
Besinshi, naqty sýbektilermen tikeleı baılanys ornatamyz.
Altynshy, halyqaralyq uıymdarmen ózara yntymaqtastyq ornatýǵa aıryqsha kóńil bólinedi.
Aýqymy keń aldaǵy jumys barysy týraly júıeli túrde jedel aqparat berip otyratyn bolamyz”, - dep túıindedi ol.
“Adyrna” ulttyq portaly
