جاڭا زاڭ جوباسىنىڭ ارقاسىندا ەرەكشە قاجەتتىلىكتەرى بار بالانى ساناتوري-كۋرورتتىق ەمدەۋگە الىپ باراتىن اتا-انالاردىڭ بىرىنە سول جەردە تۇرۋ جانە تاماقتانۋ شىعىندارى وتەلەدى.
وسى جىلدى مەملەكەت باسشىسى قاسىم-جومارت توقاەۆ بالالار جىلى دەپ جاريالاعان بولاتىن. وسىعان بايلانىستى ۇكىمەت ءتيىستى ءىس-شارالار جوسپارىن دايىنداپ، ونى «AMANAT» پارتياسى جانىنداعى وتباسى جانە حالىقتى الەۋمەتتىك قورعاۋ ماسەلەلەرى جونىندەگى رەسپۋبليكالىق قوعامدىق كەڭەس مۇقيات زەردەلەدى.
وسى جوسپاردى قاراۋ جانە بالالاردىڭ قۇقىن قورعاۋدى قامتاماسىز ەتۋگە قاتىستى پارتيانىڭ اتقارىپ جاتقان جۇمىستارى تۋرالى باق وكىلدەرىنە ءماجىلىس دەپۋتاتتارى، «AMANAT» پارتياسى فراكتسياسىنىڭ مۇشەلەرى دينارا زاكيەۆامەن ەلنۇر بەيسەنباەۆ ءباسپاسوز ماسليحات بارىسىندا ايتىپ بەردى.
جىل باسىنان باستاپ بارلىق وڭىردە 147 مىڭ بالا تۇراتىن 247 ينتەرناتتا ءومىر ءسۇرۋ جاعدايىن جاقسارتۋ جانە جوندەۋ جۇمىستارىن جۇرگىزۋ جونىندەگى جوسپارلارعا قول قويىلدى. بۇعان دەيىن مۇنداي شارالار 130 مەكەمەدە قابىلدانعان بولاتىن.
قيىن جاعدايعا تاپ بولعان وتباسىلارعا، ايەلدەر مەن بالالارعا كەشەندى كومەك كورسەتۋ جانە زورلىق-زومبىلىققا ۇشىراۋ ماسەلەلەرى بويىنشا جاردەم بەرۋ ماقساتىندا «AMANAT» پارتياسىنىڭ جانىنان «111 شۇعىل قىزمەتى» بايلانىس ورتالىعى اشىلعان ەدى. وعان 25 مىڭنان استام ءوتىنىش كەلىپ ءتۇستى. سونىمەن قاتار، بۇل قىزمەت ارنايى قۇرىلعان جەدەل ارەكەت ەتۋ توپتارىمەن ءوزارا بايلانىستا جۇمىس ىستەيدى. ولاردىڭ بىرلەسىپ اتقارعان جۇمىسىنىڭ ناتيجەسىندە قيىن جاعدايداعى 64 مىڭ وتباسىنا كەشەندى كومەك كورسەتىلدى.
«باقىتتى وتباسى» پارتيالىق جوباسى اياسىندا وتكەن جىلى بالالار مەن وتباسىلارعا كومەك كورسەتۋگە باعىتتالعان 6 مىڭنان استام ءىس-شارا جۇزەگە اسىرىلدى.
ءباسپاسوز كونفەرەنتسياسىندا حالىق قالاۋلىلارى ۇكىمەت قاۋلىسىمەن بەكىتىلگەن بالالار جىلىن وتكىزۋ جونىندەگى ءىس-شارالار جوسپارىنا ەرەكشە نازار اۋداردى. ونى ىسكە اسىرۋعا 48,3 ملرد تەڭگە، ونىڭ ىشىندە 16,7 ملرد تەڭگەسى رەسپۋبليكالىق بيۋدجەتتەن قاراستىرىلعان. قۇجاتتا 50 تارماق بار، ولاردىڭ كوپشىلىگىن دەپۋتاتتار قايتا قاراۋ قاجەت دەپ سانايدى.
«جوسپار شىعارماشىلىق بايقاۋلاردان، جيىنداردان، ءتۇرلى ۇسىنىمداردان، ءتىپتى بالالار لاگەرلەرىندە جازعى دەمالىس ماۋسىمىن اشۋدان تۇرادى. نەگە قاراجاتتى بارلىق بالالاردى قوعامدىق كولىكتە تەگىن ءجۇرۋ، مەكتەپتەردە تەگىن تۇسكى اسپەن قامتاماسىز ەتۋ سياقتى جۇيەلى ماسەلەلەردى شەشۋگە باعىتتاماسقا؟ اشىعىن ايتقاندا، بالالاردىڭ قۇقىن قورعاۋ سالاسىنداعى ۋاكىلەتتى ورگان – ءبىلىم جانە عىلىم مينيسترلىگىنىڭ جۇمىسى تۇسىنىكسىز», دەدى دينارا زاكيەۆا.
سونىمەن قاتار، دەپۋتات اقپان ايىنىڭ باسىندا «AMANAT» پارتياسى فراكتسياسىنىڭ مۇشەلەرى جۇيەسىز شارالارعا قاجەتسىز شىعىنداردىڭ ورنىنا از قامتىلعان وتباسىلارداعى ءاربىر بالاعا اتاۋلى الەۋمەتتىك كومەك مولشەرىن 35 مىڭ تەڭگەگە دەيىن ارتتىرۋعا، اكىمدىكتەردە قيىن جاعدايداعى وتباسىلارمەن جۇمىستى ۇيىمداستىرۋ ءۇشىن وتباسى ىستەرى جونىندەگى باسقارمالار قۇرۋدى ۇسىنعانىن ەسكە سالدى. وتباسى ينستيتۋتىن نىعايتۋ، وتباسىنداعى قولايسىز جاعدايدىڭ، بالالارعا قاتىگەزدىك تانىتۋدىڭ الدىن الۋ جونىندەگى نىسانالى ينديكاتورلاردى وڭىرلىك دامۋ جوسپارىنا ەنگىزۋ جايىندا ۇسىنىس بەرىلدى. بىراق بۇل باستامالاردىڭ بارلىعىن ۇكىمەت قولدامادى.
«جالپى العاندا، 100 ملرد تەڭگەدەن استام، ءار وڭىرگە 3-تەن 32 ملرد تەڭگەگە دەيىن قاراجات قاراستىرىلعان بالالار جىلىنا ارنالعان وڭىرلىك جوسپارلار كوڭىل كونشىتپەيدى. ولاردىڭ كەيبىرەۋلەرىندە عانا ينكليۋزيانى قولداۋ كابينەتتەرىن، دەنە شىنىقتىرۋ-ساۋىقتىرۋ ورتالىقتارىن، ءاۋتيزمى بار بالالارعا ارنالعان ورتالىقتاردى اشۋ سياقتى ماڭىزدى ءىس-شارالار كوزدەلگەن. بۇل جوسپارلارداعى ماڭىزدى ءىس-شارالاردىڭ ۇلەسى 35%-دان اسپايدى، ال قالعانىنىڭ بارلىعى: «ەرتەگى پرەمەراسى»، جاڭا جىلدىق شىرشالار، قاشىقتىقتان وتكىزىلەتىن چەمپيوناتتار، ايتىستار، مەكتەپتەردىڭ اشىلۋ راسىمدەرى جانە ت.ب.», دەدى ەلنۇر بەيسەنباەۆ.
ءباسپاسوز ماسليحاتى بارىسىندا حالىق قالاۋلىلارى ەرەكشە قاجەتتىلىكتەرى بار ادامداردىڭ ءومىر ءسۇرۋ ساپاسىن جاقسارتۋ جونىندەگى جۇمىستارعا دا توقتالدى. دەپۋتات ەلنۇر بەيسەنباەۆ اتاپ وتكەندەي، ءماجىلىستىڭ سوڭعى جالپى وتىرىسىندا ءبىرىنشى وقىلىمدا ءتيىستى زاڭ جوباسى ماقۇلدانعان.
«ءبىز مۇگەدەك بالانى ساناتوري-كۋرورتتىق ەمدەۋگە الىپ بارعان اتا-اناسىنىڭ بىرەۋىنە ءبىرىنشى قاجەتتىلىك شىعىندارىنىڭ وتەلۋىن ۇسىنامىز. ماسەلەن، سول جەردە تۇرۋ جانە تاماقتانۋ شىعىندارى. الدىن الا ەسەپتەۋلەر بويىنشا، 3 جىل ىشىندە ساناتورلىق-كۋرورتتىق ەمدەلۋگە اتا-اناسىمەن نەمەسە زاڭدى وكىلدەرىمەن بىرگە كەمىندە 62 مىڭ بالا بارادى», - دەدى ول.
ايتا كەتۋ كەرەك، بۇل زاڭ جوباسىندا مۇگەدەكتىكتى بەلگىلەۋدىڭ سىرتتاي نىسانى قاراستىرىلعان. بارلىق تاكسوپاركتەر مۇگەدەكتىگى بار ادامدار ءۇشىن قازىرگىدەي 30 ەمەس، ءار 10 تاكسيگە ءبىر تولىق بەيىمدەلگەن ماشينانى قامتاماسىز ەتۋى كەرەك. ال جاستار ساياساتى جونىندەگى زاڭ جوباسىندا بارلىق كامەلەتكە تولماعاندار ءۇشىن قوعامدىق كولىكتە تەگىن ءجۇرۋ نورماسى قاراستىرىلعان.
