سەمينارعا پارتيالىق ەمەس بايقاۋشىلار ورتالىعى فيليالدارىنىڭ توراعالارى مەن بايقاۋشىلارى قاتىستى.
قازىرگى ۋاقىتتا بايقاۋشىلار سانىن ايماقتار بويىنشا ناقتىلاۋ، ترەنينگتەر وتكىزۋ، ولارعا ماتەريالدار ازىرلەۋ جۇمىستارى ءجۇرىپ جاتىر.
پارتيالىق ەمەس بايقاۋ ورتالىعىنىڭ توراعاسى تولەگەن كۇنادىلوۆ: «اتا-زاڭعا ەنگىزىلەتىن وزگەرىستەر جاڭا قازاقستاننىڭ باعىت-باعدارىن ايقىنداپ بەرەدى. ءبىزدىڭ ماقساتىمىز – 5 ماۋسىم كۇنى وتەتىن رەفەرەندۋمدى، ونىڭ ىشىندە سايلاۋ ۋچاسكەلەرىندە بايقاۋ مەن مونيتورينگ جۇرگىزۋگە قاتىسۋ. ونىڭ ايقىن، ءادىل ءوتۋىن قامتاماسىز ەتۋ ءۇشىن پارتيالىق ەمەس بايقاۋشىلار دا ۇلكەن رول اتقارادى. ول ءۇشىن بايقاۋشىلار وزدەرىنىڭ قۇقىقتارى مەن مىندەتتەرىن جانە زاڭنامانى ءبىلۋى ءتيىس. قازىر بايقاۋشىلار ارنايى وقىتۋدان ءوتىپ، ءبىلىمىن شىڭداۋدا» دەپ اتاپ ءوتتى.
سەمينارعا قاتىسۋشىلار بايقاۋشىلاردىڭ فۋنكتسيالارى مەن مىندەتتەرىن، سونداي-اق «رەسپۋبليكالىق رەفەرەندۋم تۋرالى» قازاقستان رەسپۋبليكاسى زاڭىنىڭ جانە «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسى زاڭىنىڭ نەگىزگى ەرەجەلەرىن تالقىلادى.
سونداي-اق بايقاۋشىلار سايلاۋ ورگاندارىنىڭ قۇزىرەتى، داۋىس بەرۋ كۇنى سايلاۋ كوميسسياسىنىڭ قىزمەتىن ۇيىمداستىرۋ، قوعامدىق بايقاۋشىلاردىڭ قۇقىقتارى مەن مىندەتتەرى، سونداي-اق ولاردىڭ جۇمىس ىستەۋ قاعيداتتارى سىندى ماسەلەلەردى قارادى.
وسى باعىتتا قاتىسۋشىلارعا سايلاۋ بويىنشا تاجىريبەسى جەتىك مامان، ورتالىق سايلاۋ كوميسسياسىنىڭ ەكس-مۇشەسى سەرىك سىدىقوۆ «رەسپۋبليكالىق رەفەرەندۋمداعى بايقاۋشىلاردىڭ وكىلەتتىكتەرى، قۇقىقتارى مەن مىندەتتەرى» تاقىرىبىندا ءدارىس بەردى.
سپيكەر قر زاڭدارىندا بەلگىلەنگەن بايقاۋشىلاردىڭ قۇقىقتارى مەن مىندەتتەرىنىڭ نەگىزگى سيپاتتامالارى مەن ەرەكشەلىكتەرىن تولىعىراق باياندادى.
«رەفەرەندۋمدا بايقاۋشىلاردىڭ ءرولى وتە ماڭىزدى. بايقاۋشىلار پروتسەستى وبەكتيۆتى تۇردە قاداعالاپ، ءادىل جانە ادال وتكىزۋگە ىقپال ەتۋ. بايقاۋشىنىڭ نەگىزگى فۋنكتسياسى داۋىس بەرۋگە، سايلاۋ ۋچاسكەسىندە داۋىس بەرۋ قورىتىندىلارىن بەلگىلەۋگە قوعامدىق باقىلاۋدى قامتاماسىز ەتۋ جانە ازاماتتاردىڭ سايلاۋ قۇقىقتارىنىڭ ساقتالۋىن قاداعالاۋ بولىپ تابىلادى»،-دەدى سەرىك سىدىقوۆ. سەميناردا رەفەرەندۋمعا دايىندىق بارىسىن تالقىلانىپ، قاتىسۋشىلاردىڭ سۇراقتارىنا جاۋاپ بەرىلدى.
"ادىرنا" ۇلتتىق پورتالى
