بۇگىن حالىقارالىق تۇركى اكادەمياسى نۇر-Cۇلتان قالاسىنداعى قر ۇلتتىق اكادەميالىق كىتاپحاناسى عيماراتىندا كورنەكتى مەملەكەت جانە قوعام قايراتكەرى، بەلگىلى تۇركولوگ، عالىم مىرزاتاي جولداسبەكوۆتىڭ 85 جاسقا تولعان مەرەيتويىنا وراي «كىسىلىك كەلبەتى» اتتى حالىقارالىق عىلىمي كونفەرەنتسيا وتكىزدى.
القالى جيىنعا حالىقارالىق تۇركى اكادەمياسىنىڭ پرەزيدەنتى دارحان قىدىرالى، تۇركيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ۋفۋك ەكيدجي، ازەربايجان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى اگالار اتاموگلانوۆ، تۇرىكمەنستاننىڭ قازاقستانداعى توتەنشە جانە وكىلەتتى ەلشىسى باتىر رەدجەپوۆ، يران يسلام رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مادجيد سامادزادە سابەر، وتانداستار قورىنىڭ باسشىسى ابزال ساپاربەكۇلى، فيلولوگيا عىلىمدارىنىڭ دوكتورى ءادىل احمەتوۆ، مەملەكەت جانە قوعام قايراتكەرى قۋانىش سۇلتانوۆ، س.سەيفۋللين اتىنداعى مۋزەيدىڭ ديرەكتورى نەسىپبەك ايتۇلى، سونىمەن قاتار كورنەكتى مەملەكەت جانە قوعام قايراتكەرلەرى، پارلامەنت دەپۋتاتتارى، جوعارعى وقۋ ورىندارىنىڭ رەكتورلارى، عىلىمي-زەرتتەۋ ورتالىقتارىنىڭ باسشىسىلارى ،باۋىرلاس ەلدەردىڭ قازاقستانداعى ەلشىلەرى، تانىمال عالىمدار، سونداي-اق بىرقاتار جەتەكشى باق باسشىلارى قاتىستى.
جيىنعا قاتىسۋشىلار عالىم م.جولداسبەكوۆتى مەرەيلى جاسىمەن قۇتتىقتاپ، تۇركولوگيا سالاسىنا سىڭىرگەن زور ەڭبەگى تۋرالى پايىمدى پىكىرلەرىمەن ءبولىستى.
كەلەلى كەزدەسۋ بارىسىندا اكادەميا باسشىسى دارحان قىدىرالى مىرزاتاي جولداسبەكوۆتى تۇركولوگيا عىلىمىنا قوسقان ەرەن ەڭبەگى ءۇشىن تۇركى اكادەمياسىنىڭ ارنايى تاعايىندالعان «ۆيلگەلم تومسەن» مەدالىمەن ماراپاتتادى.
سونىمەن قاتار، تاعىلىمدى ءىس-شارا اياسىندا كۇلتەگىن ەسكەرتكىشى ماتىندەرىنىڭ الەمنىڭ 14 تىلىندەگى عىلىمي اۋدارمالارى جيناعى كوپشىلىك نازارىنا ۇسىندى. عىلىمي جيناقتا كۇلتەگىن بىتىكتاسى ءماتىنىن اعىلشىن، ازەربايجان،قازاق،كورەي، قىرعىز،ماجار، مونعول، نەمىس، ورىس، تاتار، تۇرىك، تىۆا،قىتاي جانە فرانتسۋز تىلدەرىندە عىلىمي ءارى كوركەم اۋدارمالارى بەرىلىپ وتىر.
ايتا كەتۋ كەرەك، كۇلتەگىن جازبا ەسكەرتكىشىنىڭ مىرزاتاي جولداسبەكوۆ جاساعان قازاق جانە ورىس تىلىندەگى جاڭعىرتپاسى وقىرمان تاراپىنان جىلى قابىلدانىپ، كەڭ تارالعان بولاتىن. بۇل نۇسقا دا اتالعان جيناققا ەنگىزىلگەن.
ىرگەلى ەڭبەككە كۇلتەگىن عۇرىپتىق كەشەنى بويىنشا سوڭعى كەزدە جاسالعان سونى عىلىمي مالىمەتتەر، ارحيۆتىك جانە تاريحي قۇجاتتار، ەستامپاج ۇلگىلەرى، بۇگىندەرى سيرەك كەزدەسەتىن مالىمەتتەر، فوتوسۋرەتتەر، كەشەننىڭ سىزبا جاڭعىرتپاسى سەكىلدى بىرقاتار ماعلۇماتتار جۇيەلەنىپ ەنگىزىلدى.
"ادىرنا" ۇلتتىق پورتالى
