مولدوۆانىڭ بۇرىنعى پرەزيدەنتى يگور دودون "مەملەكەتكە وپاسىزدىق جاساۋ" بابى بويىنشا 72 ساعاتقا قاماۋعا الىندى. بۇل جونىندە مولدوۆا باس پروكۋراتۋراسىنىڭ ءباسپاسوز حاتشىسى مارياننا كيورپەك ايتتى، دەپ حابارلايدى "ادىرنا" ۇلتتىق پورتالى "azattyq.org" سايتىنا سىلتەمە جاساپ.
سەيسەنبى كۇنى تاڭەرتەڭ مولدوۆانىڭ جەمقورلىقپەن كۇرەس پروكۋراتۋراسى مەن اقپارات جانە قاۋىپسىزدىك قىزمەتى "زاڭسىز جولمەن بايىدى، وتانىن ساتتى" دەگەن كۇدىكپەن دودوننىڭ ءۇيى مەن تاعى 11 عيماراتتى ءتىنتىدى.
18 مامىردا مولدوۆانىڭ باس پروكۋراتۋراسى دودوننىڭ وليگارح ۆلاديمير پلاحوتنيۋكتەن پارا الدى دەگەن كۇدىككە ءىلىنىپ، ۇستىنەن قىلمىستىق ءىس قوزعالعانىن حابارلادى. وعان 2019 جىلى تۇسىرىلگەن ۆيدەو جازبا ىلىك بولعان. جاسىرىن كامەراعا جازىلعان ۆيدەودا پلاحوتنيۋكتىڭ سول كەزدەگى پرەزيدەنت يگور دودونعا قارا پاكەت بەرگىسى كەلگەنى كورىنەدى. دودون پاكەتكە جاقىنداماعان، بىراق ونى الدەكىمگە بەرۋدى تاپسىرعان. ۆيدەودان دودون مەن پلاحوتنيۋك پارلامەنتتە كونستيتۋتسيالىق كوپشىلىكتى قۇرايتىن كواليتسيا قۇرۋ ماسەلەسىن تالقىلاعانى بايقالادى. TV-8 مالىمەتىنە قاراعاندا، دودون "پۋتينگە ۇنەمى الدەنە جازىپ تۇراتىنىن" ايتقان.
ۆيدەو جاريالانعاننان كەيىن تەرگەۋ باستالعان، بىراق جەمقورلىقپەن كۇرەس پروكۋراتۋراسى باستاپقىدا ەشقانداي قىلمىس بەلگىسىن بايقاماعان، سوت تا ءىس قوزعاۋدان باس تارتقان. وتكەن اپتادا كيشينەۆتىڭ اپەللياتسيالىق پالاتاسى سوت شەشىمىنىڭ كۇشىن جويعان. دودون تاعىلعان ايىپتىڭ ءبارىن تەرىسكە شىعارىپ وتىر.
"ادىرنا" ۇلتتىق پورتالى
