حالىق ءۇشىن گازدىڭ قولجەتىمدىلىگى بويىنشا ەلدەر رەيتينگىندە قازاقستان ءبىرىنشى ورىندا، ال رەسەي ەكىنشى قاتاردا. بۇل رەيتينگتى ريا Rating ساراپشىلارى دايىنداعان، دەپ حابارلايدى “ادىرنا” ۇلتتىق پورتالى.
«حالىقتىڭ گازبەن قامتىلۋى بويىنشا ءبىرىنشى ورىندى قازاقستان يەلەندى. ونىڭ ورتاشا تۇرعىنى ورتاشا ايلىق جالاقىسىنا 8,6 مىڭ تەكشە مەتر گاز ساتىپ الا الادى. مۇنداعى جالاقى سالىستىرمالى تۇردە تومەن، بىراق گاز باعاسى رەيتينگكە قاتىسقان بارلىق ەلدەردىڭ ىشىندەگى ەڭ تومەنى. ەكىنشى ورىندى 7,4 مىڭ تەكشە مەترمەن رەسەي يەلەندى”، دەلىنگەن جازبادا.
ۇزدىك بەستىككە ۇلىبريتانيا، ليۋكسەمبۋرگ جانە اۆستريا دا كىردى. بۇل ەلدەردىڭ تۇرعىندارى 3,9 مىڭ تەكشە مەتردەن استام گاز ساتىپ الۋ مۇمكىندىگىنە يە.
مولدوۆا تۇرعىندارى گازدى ەڭ از ساتىپ الا الادى: ورتاشا جالاقىعا – 858 تەكشە مەتر. بۇل جەتەكشى قازاقستانمەن سالىستىرعاندا ون ەسە از. مولدوۆادان بولەك بولگاريا، گرەكيا، رۋمىنيا جانە بوسنيا جانە گەرتسەگوۆينا دا اۋتسايدەرلەر قاتارىندا. بۇل ەلدەردىڭ تۇرعىندارى ايىنا 1,4 مىڭ تەكشە مەتردەن از گاز ساتىپ الا الادى.
”ادىرنا” ۇلتتىق پورتالى
