ءماجىلىستىڭ ەكس-سپيكەرى نۇرلان نىعماتۋليننىڭ ۇلى نۇرجان نۇرلانوۆ «قازمۇنايگاز-اەرو» كومپانياسىنىڭ باس ديرەكتورى قىزمەتىنەن كەتىپ، ونىڭ ورنىنا يلدار شامسۋتدينوۆ تاعايىندالدى، دەپ حابارلايدى "ادىرنا" ۇلتتىق پورتالى.
بۇل تۋرالى https://t.me/dalainside تەلەگرامم كانالى جازدى.
نۇرجان نۇرلانوۆ بۇل قىزمەتكە 2019 جىلدىڭ اقپان ايىندا تاعايىندالعان بولاتىن. قاڭتار وقيعاسىنان كەيىن ونىڭ اكەسى نۇرلان نىعماتۋلين قر پارلامەنتى ءماجىلىسىنىڭ توراعاسى قىزمەتىنەن كەتتى.
اتالىمىش كومپانيا 2014 جىلى قۇرىلعان بولاتىن. ۇكىمەتتىڭ قاۋىلىسىمەن «قازمۇنايگاز-اەرو» كومپانياسى قر قورعانىس مينيسترلىگىنە، قر ۇقك شەكارا قىزمەتىنە، ۇلتتىق گۆاردياعا جانە توتەنشە جاعدايلار مينيسترلىگىنە قاجەتتى بەنزين، ديزەل وتىنى، مازۋت جانە اۆيا جانارماي جەتكىزەتىن بىردەن-ءبىر كومپانيا بولىپ بەكىتىلگەن-ءدى.
ياعني، «قازمۇنايگاز-اەرو» كومپانياسى وزدەرىنىڭ ءونىمىن كىمدەرگە ساتامىز دەپ باس اۋىرتقان ەمەس. مۇناي وڭدەۋ زاۋىتتارىنان قاجەتتى جانارمايدى الىپ، ساتىپ الۋشىعا ەش قينالماي جەتكىزىپ بەرەدى.
قازىرگى تاڭدا ءار وبلىستا جانار-جاعارماي جەتكىزۋ ىسىمەن اينالىساتىن شاعىن كومپانيالار بار. «قازمۇنايگاز-اەرو» سىندى كومپانيالار ولاردى تۇنشىقتىرىپ وتىرعانى جاسىرىن ەمەس.
"ادىرنا" ۇلتتىق پورتالى
