قازاقستاننىڭ ەڭبەك سىڭىرگەن ءارتىسى ساعات جىلگەلديەۆ ومىردەن وزدى، دەپ حابارلايدى “ادىرنا” ۇلتتىق پورتالى.
سەرىك ابىكەنۇلى ءوز facebook پاراقشاسىندا ەستەلىكتەرمەن ءبولىسىپ، ساعات جىلگەلدينوۆتىڭ باقيلىق بولعانىن ەستىرتتى.
“1983 الدە 84-جىلى تالدىقورعان وبلىسىنىڭ ونەرلى قاۋىمى الماتىداعى الامانعا قاتىستى. توپ باسىندا اكەمىز ابىكەن، ول كىسى ايتىسقا تۇسەدى. جەتىسۋ ءانشىسى دەپ گۇلمايدان سۇندەتوۆا شىقتى. ال جىرشىلار جارىسىنا وبلىستىق تەاتردىڭ جاس اكتەرى ساعات اعا جىلگەلديەۆ قاتىسىپ ەدى. كوزى جاۋدىرەگەن قياق مۇرتتى جىگىت مۇقاعاليدىڭ سوزىنە جازىلعان الماحان اپامىزدىڭ "جاپىراق جۇرەك جاس قايىڭىن" ورىنداعاندا زالداعى جۇرتتىڭ جانارىنان جاس سورعالاپ سالا بەرگەن.
وسى ايتىستان كەيىن "الاتاۋ" تەلەارناسى ستۋدياعا شاقىرىپ، اكەمىزدەن باقتىباي مەن تەزەك تورەنىڭ ايتىسىن، ساعات اعادان "جاس قايىڭدى" جازىپ الدى. سول جاستىق داۋرەنىن، اكەمىزدى ۇمىتپاي ءجيى سالەم جولدايتىن.
بەۋ، دۇنيە! ...كەلىسەمىسىڭ، جاس قايىڭ، جانىمدى ايىرباستايىن... الاتاۋدىڭ بوكتەرىنە قايىڭنىڭ ءبىر جاس شىبىعى بىتكەن شىعار. ساعات اعا باقيلىق بولىپتى. يمانىڭىز سالامات بولسىن، اعا”،- دەپ جازدى ول.
“ادىرنا” ۇلتتىق پورتالى
