ءسابيت شونتاقباەۆ قۇتقارىپ قالعان قىزدىڭ جاعدايى بەلگىلى بولدى

2959
Adyrna.kz Telegram

كۇنى كەشە عانا ءسابيت شونتاقباەۆ قۇتقارىپ قالعان نۇر-سۇلتان قالاسىنداعى كوپقاباتتى پاتەرلەردىڭ بىرىندە بالكونعا ءىلىنىپ تۇرعان ءۇش جاسار ايزەرەنى اناسى جالعىز ءوزى تاربيەلەپ وتىرعاندىعى بەلگىلى بولدى. قازىر قىزدىڭ جاعدايى قالىپتى، دارىگەر تەكسەرىپ، قولداۋ كورسەتكەن، دەپ حابارلايدى "ادىرنا" ۇلتتىق پورتالى  "Azattyq rýhy" سايتىنا سىلتەمە جاساپ.

اتى-جوندەرىن جازباۋىمىزدى سۇراعان كورشىلەرىنىڭ سوزىنشە، ايزەرەنىڭ اناسى بالاباقشادا تاربيەشى بولىپ جۇمىس ىستەيدى. ول كۇن سايىن كىشكەنتاي بالاسىن وزىمەن بىرگە جۇمىسقا الىپ كەتەتىن. ال كەشە ول قىزىن جيەن ىنىسىنە قالدىرىپ كەتىپتى.

«وزدەرىن اندا-مۇندا عانا كورەمىز. اناسى اسا كوپ سويلەمەيدى، جۇمىسقا بارىپ كەلىپ جۇرەدى. پاتەر وزىنىكى. كەشە جيەن ىنىسىنە قالدىرىپ كەتكەن ەكەن، ول بولسا ءوزىنىڭ جۇمىستارىمەن سىرتقا شىعىپ كەتىپتى. وسى ۋاقىتتا بالاقاي تەرەزەگە شىعىپ العان. بالانى پەرىشتەسى قاقتى دەگەن وسى شىعار. ءبىزدىڭ ءوزىمىز جەردەن قاراپ تۇرىپ، اياق-قولىمىز دىرىلدەپ، جۇرەگىمىز دۇرسىلدەپ تۇردى. كەشەگى ءسابيت پەن ساعيعا دەيىن دە جاس جىگىتتەر قۇتقارماق بولىپ، 8-قاباتتا ءۇيدىڭ ەسىگىن بۇزا الماي تۇرعان. اۋىلدىڭ جىگىتتەرى ىلدىم-جىلدىم شىعىپ، بالاقايدى قاعىپ الدى. سول ۋاقىتتىڭ وزىنە 15-20 مينۋت كەتتى. ايزەرەنىڭ مىقتىلىعىنا ءتانتى بولدىق. بالا ەمەس پە، كەشە كەشتە وسىندا تۇك بولماعانداي اسىر سالىپ، ويناپ ءجۇردى»، – دەيدى كورشىلەرى.

ايزەرەنىڭ ۇيىنە بارىپ جاعدايىن بىلەيىك دەپ ەدىك، بىراق ەسىكتى ەشكىم اشپادى. كورشىلەرىنىڭ ايتۋىنشا، اناسى قىزىن قۇتقارىپ قالعان ءسابيت شونتاقباەۆتى ماراپاتتاۋ راسىمىنە دە قاتىسپادى دەيدى.

«كەشە وسى تۇرعىن ءۇيدىڭ ادامدارى جينالىپ، سابيتكە ءوز راقمەتىمىزدى ايتتىق. بىراق اناسى ول شاراعا قاتىسپادى. بالكىم، كوپشىلىكتىڭ الدىنا شىعۋعا قىسىلعان بولار. مۇندا جالعىزباستى انانىڭ جاعدايىن تۇسىنۋگە تىرىسۋ كەرەك شىعار. جازىم دەگەن اياق استىنان عوي. وتباسىن اسىرايتىن جولداسى بولعاندا مۇنداي بولمايتىن با ەدى؟! جالعىز ايەلدى كىنالاي بەرۋ دۇرىس ەمەس. مەن دە جالعىزباستى انامىن. ايزەرەنىڭ اناسىنىڭ جاعدايىن وتە جاقسى تۇسىنەمىن»، – دەدى كورشىسى.

قوعامدىق دەنساۋلىق ساقتاۋ باسقارماسىنىڭ مالىمەتىنشە، وقيعادان كەيىن بالا مەن اناسى بالالار اۋرۋحاناسىنا جۇگىنگەن.

«ءبۇلدىرشىندى بەيىندى دارىگەرلەر قاراپ، رەنتگەن جاسادى. ناتيجەلەرى جاقسى، بالانىڭ ەشقانداي جاراقاتى جوق. سونداي-اق باسقارما وكىلدەرى پسيحولوگتاردىڭ كەڭەسى، بالاعا الەۋمەتتىك قىزمەتكەرلەردىڭ كومەگى نەمەسە باسقا دا مەديتسينالىق كومەك قاجەتتىگىن انىقتاۋ ءۇشىن بالانىڭ اناسىمەن تىلدەستى. قاجەت بولعان جاعدايدا بۇل وتباسىنا بارلىق مەديتسينالىق كومەك پەن مامانداردىڭ كەڭەسى تولىق كولەمدە كورسەتىلەتىن بولادى»، – دەدى ءباسپاسوز قىزمەتى.

ال قالالىق پد ءباسپاسوز قىزمەتى مۇنداي جاعدايدا بالانىڭ اتا-اناسىنا قانداي جازا قولدانىلاتىنى تۋرالى مالىمەت بەرمەدى. 

 

"ادىرنا" ۇلتتىق پورتالى

پىكىرلەر