97 جاستاعى سوعىس ارداگەرى رايسا سافونيچەۆا جەڭىس كۇنىن قارتتار ۇيىندە قارسى الدى، دەپ حابارلايدى «ادىرنا» ءتىلشىسى «حابار 24» ارناسىنا سىلتەمە جاساپ.
عاسىر جاساعان كەيۋانا مايدانعا 18 جاسىندا اتتانعان. وق پەن وتتىڭ ورتاسىندا ءجۇرىپ، ەستۋ قابىلەتىنەن ايىرىلدى. بىراق قايسارلىعىنىڭ ارقاسىندا وزىنە جۇكتەلگەن بار مىندەتتى ابىرويمەن اتقارعان.
«جەڭىس كۇنى – بۇل مەنىڭ مەرەكەم. وسى كۇنگە جەتۋ ءۇشىن سۇم سوعىستى كوردىك. قينالدىق، جىلادىق بىراق جەڭىسكە جەتتىك. قالانى بومبالاپ جاتقاندا ءۇيىندى استىندا قالدىم. سوندا قينالىپ دەمالىپ جاتقاندا سوعىس ءانىن شىرقاي باستادىم. ءان ايتقاندى جاقسى كورەم، سوعىس اندەرىن ەرەكشە. بۇگىنگى بەيبىتشىلىكتى باعالاڭىزدار. قازىرگى جاستار سۇم سوعىستى كورمەسىن. ەلدە تىنىشتىق بولسىن دەپ تىلەيمىن. مەندە باسقا ارمان جوق»،— دەيدى ول.
رايسا سافونيچەۆا 1925 جىلى 10 شىلدەدە باشقۇرتستاندا دۇنيەگە كەلگەن. 1944 جىلى 4 ناۋرىزدا ءوز ەركىمەن مايدانعا اتتاندى. مينسك قالاسىنداعى قىسقا مەرزىمدى بايلانىس كۋرسىن اياقتاپ، ەكىنشى ۋكراين مايدانىنا جىبەرىلگەن. كيەۆ قالاسى مەن بۋداپەشت ماڭىنداعى شايقاستارعا قاتىسىپ، جەڭىس كۇنىن سول جەردە قارسى الدى. بۇگىندە ارداگەر ەلورداداعى قارتتار ۇيىندە تۇرادى.
«ادىرنا» ۇلتتىق پورتالى
