Astanalyq sýretshi memlekettik qyzmetkerlerdi «kápir» dep ataǵany úshin qamaýǵa alyndy. Ulttyq qaýipsizdik komıteti sýretshi Dáýren Makınniń ústinen tergeý júrgizip jatyr. Bul týraly Azattyq radıosy jarııalady, dep habarlaıdy "Adyrna" ulttyq portaly.
D. Makınniń qamalǵanyna bes kún bolǵan. Ákesiniń aıtýynsha, Dáýren Makınge jeltoqsan aıynda «Arystan» degen búrkenshik aty bar adammen kezdesip, memlekettik qyzmetkerlerdi «kápir» dep atap, bılikke, onyń tutastyǵyna qarsylyqqa shaqyrǵan» degen aıyp taǵylǵan.
"Ol saıasatpen isi joq, jaı sýretshi. Namaz oqıtyny ras, ol qylmys pa?" – deıdi Asqarbek Makın.
Onyń sózin Dáýren Makınniń advokaty Jasulan Kómekov rastaıdy. Advokattyń aıtýynsha, Makınge sýret salýdy úırenemiz degen syltaýmen eki adam kelip, ortadaǵy áńgimeni dıktofonǵa jazyp alǵan.
– Basqa eshqandaı dálel joq. Barlyq aıyptaý áldebir dıktofondaǵy jazbaǵa qurylǵan. Ony da qolymyzǵa bergen joq. Biraq sol jazbaǵa saraptama jasap, Makınniń sózinde terrorıstik saryn bar ekeni, álgi eki adammen áńgimede bılikti aýystyryp, ony sharıǵat júıesine negizdep qaıta qurý kerek degen oı aıtylǵan dep qorytyndy jasaǵan, – deıdi ol.
Keı derekkózder Makın messendjerde "áldebir habarlamany jibergeni úshin" isti boldy degen boljam aıtty. Ulttyq qaýipsizdik komıteti sýretshi Makınniń tutqyndalýyna qatysty jaýap berýden bas tartyp, resmı saýal joldaýdy surady.
"Adyrna" ulttyq portaly
