8-9-مامىر كۇندەرى شىمكەنت قالاسىندا "Shim qala" ەتنو-اۋىلىندا "بەسقارۋ" اتتى ەتنو-فەستيۆال وتەدى دەپ حابارلايدى "ادىرنا" ۇلتتىق پورتالى.
فەستيۆالگە رەسپۋبليكامىزعا بەلگىلى سۋرەتشى جانە ەتنوگراف قارۋ-زەرتتەۋشى عالىم، قر سۋرەتشىلەر وداعىنىڭ مۇشەسى، قر كوركەمسۋرەت اكادەمياسىنىڭ اكادەميگى، تاريح عىلىمدارىنىڭ كانديداتى، ەۋرازيا دالالارىنداعى اسكەري ىستەردىڭ تاريحىن قايتا قالپىنا كەلتىرگەن عالىم احمەتجان قاليوللا قاتىسىپ، قازاق دالاسىنداعى قازاق باتىرلارىنىڭ ءرولى مەن ەكسپوزيتسياسىن، قارۋ جاراق تۇرلەرى مەن قولدانۋ اياسى جايلى پراكتيكالىق سەمينار وتكىزەدى.
سونداي-اق شارادا قازاق ەتنولوگيا عىلىمىندا شەجىرەتانۋ باعىتىنىڭ نەگىزىن سالۋشىلاردىڭ ءبىرى، تاريحشى، جازۋشى-دراماتۋرگ، پەداگوگ، تاريح عىلىمدارىنىڭ دوكتورى جامبىل ارتىقباەۆ باتىرلاردىڭ اسكەري تارتىپتەرى مەن قۇپيالارى، سوعىس كەزىندەگى الەۋمەتتىك-ساياسي ومىرلەرىنە قاتىستى كوپتەگەن اقپاراتتارىمەن بولىسسە، قازاق حالقىنىڭ كورنەكتى ايتىسكەرى جانە ءداستۇرلى جىرشىسى مارات سۇگىرباي باتىرلار جىرىن ورىندايدى.
جانە فەستيۆالدە ۇلتتىق اسپاپتاردا قۇلاق قۇرشىنىن قاندىرا وينايتىن "حازار" ەتنو-فولكلورلىق ءانسامبلى قازاق باتىرلارىن شابىتتاندىرعان كۇيلەرىن ويناپ، رۋحتى كۇيلەردىڭ تاريحىنان سىر تارتادى. الەمگە قازاق جاۋىنگەرلىك ونەرىن تانىتىپ جۇرگەن "نوماد" كاسكادەرلار توبى ءوز ونەرلەرىن كورسەتىپ، ماستەر-كلاسس وتكىزەدى.
ايتا كەتۋ كەرەك، جۋىردا "وڭتۇستىك" تەلەارناسىندا وسى فەستيۆالگە قاتىسۋشىلار سۇحبات بەرىپ، ۇيىمداستىرۋشىلار شارانىڭ ارنايى باعدارلاماسىمەن تانىستىرعان بولاتىن.
"ادىرنا" ۇلتتىق پورتالى
